Forward from: китобларим.
"MEN" Bas qil, ey nafs!
Asardagi har bir voqeada xuddi u yerdagi uchinchi odamdek bo'lib qoldim. Bu asar meni shu qadar hayratlantirdiki, boshlayotgan paytim bu darajada menga ta'sir qiladi deb, sira o'ylamagandim. Tavba, men shu paytgacha nega bunga ahamiyat bermadim. Ichimdan har doim kelib turadigan, meni shubxa-gumonlar qilishga, yaxshilik qilmoqchi bo'lgan paytim to'xtatishga, kichkina bo'lsada, yolg'on gapirishga, gunohlar qilishga undovchi o'sha ovoz, nafsim... Demak, nafsim har doim gapiradi, men esa u bilan gaplashmas edim, lekin bu asarni o'qishni boshlaganimdan beri nafsim bilan gaplashyapman. Ba'zi o'rinlarda unga qarshi chiqyapman, ba'zi joylarda nafsimga yengilyapman. Ba'zida emas, ko'proq men yengilyapman. Demak, shu darajada nafs quliga aylanib bo'lgan ekanmanda! U nima desa, so'zsiz bajarganmanki, endi unga so'zim o'tmayapti.
Lekin shuni ham bildimki, nafsni butunlay yengib, oyoqosti qilish uchun Mahmud Xudoiydek sabrli bo'lish kerak, ular nafslarini butunlay yengdilar, lekin, ular uchun bu juda-juda mushkul edi, ular shahar qozisi edilar, judayam mashhur obro'-e'tiborli kishi edilar, bir kunda, bir insonning gapi bilan ( ya'ni ustozi Uftoda hazratlari) mansabidan, mol-dunyosidan voz kechib, bozorda jigarfurushlik qilishni boshladilar.Va shu kundan boshlab Xudoiy nafsi bilan kurash olib borganlar va oxiri nafsi ustidan g'alaba qozondilar. Xatto, endi nafs Xudoiy kabi bo'lib borayotganini tan oladi.
Bilasizmi? Kitobni so'nggi sahifalarini o'qir ekanman, nafsim menga:
"Senga aytib bergan hikoyamdan ibrat olding, shundaymi? Ichingdan o'tgan ovozlar haqida o'ylayapsan, to'g'rimi? "Qaysi biri nafsim, qaysisi vijdonim?" deb savollar beryapsan o'zingga. Xudoiy haqida o'ylayapsan! Uftoda haqida, bu satrlarni yozgan muallif haqida, ammo hammadan ko'p MEN, ya'ni nafs haqida o'ylayapsan, to'g'rimi? Ichingdan kelgan vasvasalarimni, aytgan har bitta gapimni, xatoga boshlaganlarimni, gunohga olib borganlarimni birma-bir eslayapsan. Pushaymon bo'lib, tavbalar qilganing, irodasizlik qilib, tavbalaringni buzganlaring haqida o'yalayapsan. Hammasidan xabarim bor..."
dedi.
Bu kitobni o'qib chiqqan ekanman, yana bir narsani muhim deb sanadim. Endi hech qachon "MEN" demayman. Har ish Allohdan. Bu bilan nima demoqchiligimni o'zingiz tushunib olarsiz.
Kitobdan yana ko'plab qismlarini keltirishni juda-juda xohlayapman, lekin o'zingiz o'qib chiqqaningiz eng ma'quli. Sizlarga chin yuragimdan, yuragimning tub-tubidan maslahat beraman, bu kitobni o'qib chiqinglar! Bu qandaydir motivatsion, yoki shaxsiy rivojlanish haqidagi kitoblardan emas, ya'ni nomiga qarab, turk yozuvchisining qalamiga mansubligiga qarab xulosa qilmanglar. Bu kitob "MEN" ya'ni "NAFS" haqida, nafsini yer bilan yakson qilgan Aziz Mahmud Xudoiy hazratlari haqida.
Fotih Duman... Men bu insonga juda qiziqib qoldim, to'g'risi... Internetdan uning hayoti haqida ma'lumotlar izlab topolmadim. Endi uni qolgan asarlarini ham o'qib chiqish mobaynida biroz bo'lsada yaqindan tanimoqchiman...