O‘zimdek yashamoq qiyindir juda,
O‘zim bo‘lolmayman o‘zgalar uchun.
O‘zgalar nazdida o‘zimman, ammo
O‘zimsiz o‘tkazdim, eh-he, qancha kun.

"Sen sendek yashashni odat qilmading",
Botinim qa'rida menim dod solar.
Aqlim qamchi urar bedov yurakka
Dupuri chang solib, meni uyg‘otar.

Faqat tun meniki. Men tunda menman.
Dardimni tinglagan telba tunlarim.
Kechiringiz meni, afsusdaman ko‘p,
Mensiz o‘tib ketgan, mening kunlarim...

Fazo Abdumurod qizi