Yoshlik davrimizda ko‘plab illyuziyalarga berilib ketamiz. Eng keng tarqalgan xatolardan biri – hech qanday harakat qilmasdan kelajakda qaysidir marralarga erishish mumkin deb o‘ylash.Vaqt o‘tishi bilan, ilgari qo‘ygan har bir qadamim mening bugungi holatimga kelishga hissa qo'shganini ko'rib boryapman.
Karyerasida muvaffaqiyatga erishgan insonlarning LinkedInda biografiyasini oʻrganganimda hammasi izchil: o‘z sohasida tahsil olgan, turli stajirovkalarda qatnashgan, dasturlar va konferensiyalarga borgan, tajriba orttirgan hamda bosqichma-bosqich oldinga siljigan. Agar ortga qaralsa, uning bugungi pozitsiyasiga kelishi yillar davomida qilingan amallari natijasidir.
Hayotiy misol: Diplomatiyada birinchi kursda o‘qiyotganimda bir do‘stim bilan bu sohada ishga kirishning murakkabligi haqida gaplashgan edik. Men unga: “Biz qanday qilib diplomat bo‘lamiz? Bu yo‘lning talablariga, qiyinchiliklariga bardosh bera olamizmi?” degan savolni berdim. U esa kulib: “O‘rtoq, ko‘rasan, beshinchi kursni bitirganingda o‘zing bilmay qolasan qanday qilib diplomat bo‘lib qolganingni”, deb javob bergandi. Rosti, u diplomatiyani bitirib, bugun tibbiyot yo‘nalishida o‘qiyapti, ishlayapti, men esa boshqa yo'nalishda o'qib, ishlayapman…
Yana bir misol: Bir kishi Fransiyada xalqaro va Yevropa huquqi bo‘yicha o‘qigan. Biroq o‘qish davrida mehmonxonada ishlashga kirib, o‘qishga yetarlicha e’tibor bermagan. Diplom olgan, ammo bu sohada o‘z yo‘lini mustahkamlash uchun yetarlicha harakat qilmagan. Mehmonxonada ishlab yursam ham, yurist bo'lib, Yevropa Ittifoqi tashkilotlarida ishlay olaman deb o'ylagandir. U hozir ham mehmonxona receptionida ishlaydi va afsuski, bu qobiqdan chiqib ketishi endi juda qiyin. Umr oʻtgan, bilimlar unutilgan, yangi hayot boshlash esa juda mushkul, qoʻrquv har qanday yaxshi niyatni bosib oladi.
Shu sababli, har qanday kichik qadam kelajakdagi maqsadlaringizga yaqinlashtiradi. Ular keyingi muhim qadamlarni ishonch bilan tashlashga zamin yaratadi. Siz bir zumda qabul qilgan, arzimasdek tuyulgan qarorlaringiz aslida kelajagingizni shakllantiradi.Mahalliy ekspertlar, siz bu mavzuda fikr yuritib ko'rganmisiz? Boshqa illyuziyalar haqida bilasizmi? Menda yana misollar bor, qiziq bo'lsa, bo'lishaman.
@khumoyun_paris
