Farg‘ona tumanida Yangi yil bayrami tantanalari keng nishonlandi

Farg‘ona tumanida Yangi yil bayrami munosabati bilan ko‘tarinki ruhda o‘tkazilgan tadbirlar aholiga haqiqiy bayramona kayfiyat ulashdi. Bayram tadbirlari davomida keng qamrovli dasturlar tashkil etilib, ularda tumandagi turli yosh va ijtimoiy qatlam vakillari faol ishtirok etdi.

Tadbirlarning birinchi qismida 26-bolalar musiqa va sanʼat maktabi o‘quvchilari tomonidan tayyorlangan sahnalashtirilgan bayram dasturi namoyish etilib, tomoshabinlarga zavq bag‘ishlandi. Shuningdek, “Prezident archasi” oldida tuman Madaniyat bo‘limi tomonidan ijro etilgan kuy-qo‘shiqlar ishtirokchilarga bayramona shukuh ulashdi.

Bayram davomida Qorbobo va Qorqizlardan iborat 100 nafar ishtirokchi “Qorbobolar karvoni” sifatida tumanning asosiy ko‘chalari bo‘ylab harakatlandi. Karvon harakati davomida tuman aholisi, ayniqsa bolalar uchun unutilmas bayram taassurotlari yaratildi.

Shuningdek, tuman hokimligi, Maktabgacha va maktab ta’limi bo‘limi va Ma’naviyat va ma’rifat markazi hamkorligida 4-umumta’lim maktabi o‘quvchilari hamda 32-Davlat maktabgacha ta’lim tashkiloti tarbiyalanuvchilariga “Prezident sovg‘alari” ulashildi.

Ezgu tashabbuslar davomida tuman hokimligi, Mahallalar uyushmasi tuman bo‘limi va “Inson” ijtimoiy xizmatlar markazi vakillari Qorbobo va Qorqizlar ishtirokida ijtimoiy himoyaga muhtoj, kam ta’minlangan, boquvchisini yo‘qotgan oilalar va faxriy nuroniylarning holidan xabar oldi. Ularga bayram sovg‘alari topshirilib, quvonch ulashildi.

Shuningdek, tuman Tibbiyot birlashmasining Bolalar bo‘limida davolanayotgan bolajonlar holidan xabar olinib, ularga ham bayram sovg‘alari ulashildi. Bu tadbir bolalarning ruhiyatini ko‘tarib, ularga alohida iliqlik bag‘ishladi.

Kun davomida o‘tkazilgan bayram dasturlari va tadbirlarga jami 1630 nafar tuman aholisi va yoshlar qamrab olindi. Yangi yil munosabati bilan 1000 nafar bolalarga “Prezident sovg‘alari” ulashilib, ularning yuziga quvonch va tabassum olib kelindi.

Farg‘ona tumanida o‘tkazilgan Yangi yil bayrami tadbirlari aholining birdamligini mustahkamlash va Yangi yilni umid va shodlik bilan kutib olishga xizmat qilgani bilan alohida ahamiyat kasb etdi.


Sayt | Telegram | Facebook | Instagram | YouTube | X | Threads | WhatsApp