***

Urbanizatsiya.
Osmonda xomtalosh yotar - sim to'rlar.
Qurulishning "tirilloq" ovozi,
Nafis sayr etadi,
Balkonim aro.
Bo'ynidan shartta oladi-yu,
Bo'g'adi Ella Fitsjeralndning tovushini.
San'at turlari bir-birlarini o'ldirishga moyil.
(Odamlar singari)
Ulkan kran chiqaradigan ohang,
Qushning kuyi umriga zolim bo'lganidek.

Sulaymonga dars bergan chumoli nasli,
Bugun tunayotir mening uyimni.
"O'ldirmaslik kerak,
"An-Naml"dan
Qaysidur oyatni qo'yish lozim edi,
Shunda tark etadi, ular uyingni.
Esimdan chiqqanini qara-ya".
Shu payt ilm fan va din duel tushishga
Hozirlik ko'rar.
Ularga bo'laman - sekundant.
Afsus, menga kecha o'git bergan,
O'ris amakining gapiga kirmayapman.
U degandiki, "bo'sh odamlar,
Bo'sh suhbatlar va istalgan ichi bo'sh
Narsadan qoch".
Har holda, men shunday tushungandim.

Zamonaviy urbanizatsiya,
Ko'p qavatli binolar -
Zilzilalarga chidamli.
Rumliklardan meros -
Kanalizatsiya va
Rolton.

Nega rolton haqida yozilmagan she'r?
Osamu Dazai aytgandi:
"Kambag'allik kelishi bilan,
Tark etar sevgi".
Inim, rolton senga hamroh - vafoli,
Huddi sendagi intim ishtiyoq kabi.

Yo'q,
Men binolarga to'xtalolmayman.
Men nari borsa,
Sovet binokorligidagi futuristik uslub haqida gapirishim mumkin,
Meni axmoq deb o'ylashmasliklari uchun.
Axir, "kattalarga hamma narsani tushuntirish kerak-da".

Har qanday kaotik narsani sev!
Shunda, xulyoga ta'tiydi umring.
Yoki, sen umri-azizingni
Imlo qoidalarini o'rganish uchun
Sarflayapsanmi?
To'g'ri qilasan.
Qaytimiga qurt va saqichdan bo'lak
Nima ham olarding?!

Salmoqiddin