Adolat SDP | Buxoro viloyati Kengashi Rasmiy kanali

Oliy Majlis Qonunchilik palatasi deputati Maqsud Qurbonboyev Kogon tuman tibbiyot birlashmasiga qarashli tug‘ruq bo‘limi faoliyati bilan tanishdi. Deputat muassasada onalar va chaqaloqlarga ko‘rsatilayotgan xizmat sifati, mavjud shart-sharoitlar hamda mavjud muammolarni o‘rgandi.

Xalq noibi bemor ayollar bilan suhbatlashib, ularning tibbiy xizmatdan qoniqish darajasini bilish, davolash jarayonida duch kelayotgan qiyinchiliklarini tinglashga alohida e’tibor qaratdi. Shuningdek, muassasa shifokorlari va tibbiyot xodimlari bilan muloqot qilib, ularning mehnat sharoitlari va xizmat ko‘rsatish jarayonidagi muammolar bilan qiziqdi.

Tekshiruv davomida tug‘ruq bo‘limida atrofni devor bilan o‘rash masalasi dolzarb ekani aniqlandi. Ushbu masala xavfsizlikni ta’minlash va bemor ayollar uchun yanada qulay muhit yaratish nuqtayi nazaridan muhim ekani ta’kidlandi. Maqsud Qurbonboyev muassasa rahbariyati va mas’ullar bilan ushbu muammolarni hal etish yo‘llari bo‘yicha fikr almashdi.

Oʻrganishlar yakunida muassasaning moddiy-texnik bazasini yanada mustahkamlash, bemorlarga ko‘rsatilayotgan xizmat sifatini oshirish hamda tug‘ruq bo‘limi hududining to‘liq himoyalanganligini ta’minlash borasida tegishli tashkilotlarga murojaat qilishini bildirdi.

Mazkur uchrashuv tug‘ruq bo‘limi faoliyatini yaxshilash, bemorlarga yanada qulay sharoit yaratish va mavjud muammolarni hal qilish bo‘yicha muhim qadam bo‘lib xizmat qiladi.

Deputat Maqsud Qurbonboyev Kogon shahar tibbiyot birlashmasida: bemorlar holidan xabar olindi

Oliy Majlis Qonunchilik palatasi deputati, “Adolat” SDP fraksiyasi a’zosi Maqsud Qurbonboyev Kogon shahar tibbiyot birlashmasida bo‘lib, muassasadagi shart-sharoitlar, davolash jarayoni va bemorlarga ko‘rsatilayotgan tibbiy xizmatlar bilan yaqindan tanishdi.

Oʻrganishlar davomida deputat kardiologiya, reanimatsiya va bolalar bo‘limlarida davolanayotgan bemorlarning holidan xabar oldi. Shuningdek, u bemorlarning murojaatlarini tinglab, ularning davolanish jarayonida duch kelayotgan muammolarini o‘rgandi. Deputat tibbiy xizmat sifatini yanada oshirish, dori-darmon ta’minotini yaxshilash va bemorlarning ehtiyojlarini qondirish bo‘yicha o‘z fikrlarini bildirdi.

Maqsud Qurbonboyev muassasada faoliyat yuritayotgan shifokorlar va tibbiyot xodimlari bilan ham suhbatlashib, ularning mehnat sharoitlari, duch kelayotgan muammolari va takliflari bilan qiziqdi. Shifokorlar bilan o‘zaro muloqot davomida deputat ularning fidokorona xizmatini e’tirof etib, tibbiyot sohasi xodimlari uchun zarur sharoitlarni yaratish muhimligini ta’kidladi.

Deputat shuningdek, muassasa tarkibidagi ijtimoiy dorixonani ham ko‘zdan kechirdi. U dorixonadagi dori vositalarining narxi, sifati hamda bemorlar uchun zarur bo‘lgan muhim preparatlarning yetarli darajada mavjudligi bilan qiziqdi. Aholiga dori-darmon yetkazib berishda shaffoflik va qulaylik yaratish masalasiga alohida e’tibor qaratdi.

Uchrashuv yakunida Maqsud Qurbonboyev muassasa rahbariyati va mas’ul tibbiyot xodimlari bilan uchrashib, mavjud muammolarni hal etish yuzasidan tegishli tashkilotlar bilan hamkorlik qilishini bildirdi. U sog‘liqni saqlash tizimini yanada takomillashtirish, bemorlarning sifatli tibbiy xizmatlardan foydalanishini ta’minlash bo‘yicha o‘z takliflarini ilgari surdi.

Mazkur oʻrganish tibbiyot muassasalaridagi sharoitlarni yaxshilash, bemorlarga ko‘rsatilayotgan xizmatlar sifatini oshirish hamda tibbiyot xodimlarining ish faoliyatini yanada samarali tashkil etish yo‘lida muhim qadam bo‘lib xizmat qiladi.

Deputat Maqsud Qurbonboyev Buxorodagi onkologiya markazida: muammolar va takliflar oʻrganildi

Oliy Majlis Qonunchilik palatasi deputati Maqsud Qurbonboyev Buxoro viloyatidagi Respublika ixtisoslashtirilgan onkologiya va radiologiya ilmiy-amaliy tibbiyot markazining filialida boʻlib, u yerdagi mavjud sharoitlar, muammolar hamda takliflarni oʻrgandi.

Uchrashuvda, deputat tibbiyot muassasasining moddiy-texnik bazasi, davolash jarayoni va bemorlarga yaratilgan sharoitlar bilan yaqindan tanishdi. U shifokorlar va bemorlar bilan suhbatlashib, muassasaning faoliyatini yanada samarali tashkil etish bo‘yicha fikr va mulohazalarni tingladi.

Shuningdek, Maqsud Qurbonboyev filial hududida joylashgan ijtimoiy dorixonani ham koʻzdan kechirdi. U dorixona assortimentida bemorlar uchun zarur dori vositalarining yetarli darajada mavjudligi, narx-navo hamda xizmat koʻrsatish sifati bilan qiziqdi. Deputat dori vositalarining yetkazib berilishida shaffoflik va aholiga qulaylik yaratish muhimligini ta’kidlab, tegishli mas’ullarga zarur tavsiyalar berdi.

Oʻrganishlar davomida deputat muassasaning rahbariyati va xodimlari bilan ham uchrashib, mavjud muammolarni hal qilish bo‘yicha tegishli davlat idoralari bilan hamkorlikda ish olib borishini bildirdi. Shuningdek, sog‘liqni saqlash tizimini yanada rivojlantirish va bemorlarning sifatli tibbiy xizmatlardan foydalanishini ta’minlash borasida o‘z takliflarini ilgari surdi.

Mazkur oʻrganish onkologik kasalliklarga chalingan bemorlarga ko‘rsatilayotgan xizmatlar sifatini oshirish, muammolarni aniqlash va ularni hal qilishga xizmat qilishi kutilmoqda.

"Adolat" bilan fidokorona 30 yil

O‘zbekiston siyosiy maydonida o‘zining mustahkam o‘rniga ega bo‘lgan "Adolat" sotsial-demokratik partiyasi joriy yilda o‘zining 30 yilligini keng nishonlamoqda. Shu munosabat bilan mamlakatimiz bo‘ylab turli tadbirlar tashkil etilayotgani bois, Buxoro viloyati Kengashida ham mazkur muhim sana munosib nishonlandi. Ushbu tantanali tadbirda partiya faxriylari, faollari hamda yurtimizda faoliyat olib borayotgan boshqa siyosiy partiyalar vakillari ishtirok etdi.

Tadbirni "Adolat" SDP Buxoro viloyat Kengashi raisi Maqsud Hamidov ochib, yig‘ilganlarni partiyaning 30 yillik yubileyi bilan tabrikladi. U o‘z nutqida partiyaning asosiy maqsad va vazifalarini esga olib, bu yillar mobaynida jamiyat taraqqiyotiga qo‘shilgan hissa, adolatparvarlik tamoyillariga asoslangan siyosiy faoliyatning ahamiyati haqida gapirdi.

Shundan so‘ng, partiyaning shakllanishi va rivojlanishida muhim rol o‘ynagan faxriylar – partiyaning dastlabki yetakchilari Rahmat Ahmedov, Asror Tursunov va Buxoro viloyatidan ilk bor Oliy Majlis Qonunchilik palatasiga saylangan deputat Po‘latjon Sharopov so‘zga chiqishdi. Ular o‘z chiqishlarida partiyaning tashkil topishi va o‘z davrida amalga oshirgan ishlari xususida fikr bildirishdi, o‘zlari guvoh bo‘lgan muhim jarayonlarni eslab o‘tishdi. Tadbir ishtirokchilarini qutlab, partiyaning keyingi faoliyatiga omad tilashdi.

Tadbir davomida Oliy Majlis Qonunchilik palatasi "Adolat" fraksiyasi aʼzosi Maqsud Qurbonboyev ham ishtirok etib, partiya faxriylari va faollarini qutladi hamda kelgusidagi faoliyatida ularga muvaffaqiyatlar tiladi.

"Adolat" SDP 30 yil davomida o‘zining g‘oyaviy tamoyillariga sodiq qolgan, adolat, tenglik va ijtimoiy taraqqiyot yo‘lida fidokorona xizmat qilib kelayotgan ko‘plab partiya faollarini yetishtirdi. Tadbir davomida ana shunday fidoyi insonlar taqdirlandi. Jumladan, Tosheva Gulsara Samadovna, Rahimov Abdurashid Oloqulovich, Pardayeva Marhabo Davlatovna, Hakimov Jobir Jabborovich, Bobonazarova Mehriniso Sultonovnalar "Adolat" ko‘krak nishoni bilan taqdirlandilar.

Shuningdek, partiyaning rivojlanishiga munosib hissa qo‘shgan boshqa bir qator faollarga ham faxriy yorliq va esdalik sovg‘alari topshirildi. Bu nafaqat ularning xizmatiga berilgan e’tirof, balki kelajakda yanada samarali mehnat qilishga rag‘bat hamdir.

30 yil – har qanday tashkilot uchun jiddiy sinov davri hisoblanadi. "Adolat" SDP bu davr ichida o‘zining tamoyillariga sodiq qolib, mamlakatimizda ijtimoiy adolat, qonun ustuvorligi va demokratik qadriyatlarni targ‘ib qilishda davom etmoqda. Bugungi kunda partiya jamiyatning turli qatlamlarining huquq va manfaatlarini himoya qilish, fuqarolarning siyosiy faolligini oshirish hamda davlat boshqaruvida adolatli qarorlar qabul qilinishiga hissa qo‘shish yo‘lida izchil harakat qilmoqda.

Tantanali tadbirda kelajakdagi rejalar xususida ham so‘z yuritildi. Partiya rahbariyati va faollari jamiyatda adolat va ijtimoiy tenglikni ta’minlash yo‘lida yangi tashabbuslarni ilgari surishga tayyor ekanliklarini bildirdilar. Shuningdek, yoshlarni siyosiy faollikka jalb etish, ularning huquqiy savodxonligini oshirish borasida yanada samarali ishlar amalga oshirilishi ta’kidlandi.

Buxoroda bo‘lib o‘tgan ushbu tantanali tadbir "Adolat" SDPning o‘tgan yillar davomida bosib o‘tgan yo‘li, erishgan yutuqlari va kelajakda qo‘yiladigan maqsadlarini yana bir bor yodga soldi. Tadbir doirasida ilgari surilgan g‘oyalar va berilgan yuksak e’tiroflar partiya faollariga yanada mas’uliyat yukladi.

Shubhasiz, "Adolat" SDP o‘zining ijtimoiy-demokratik tamoyillariga asoslangan holda kelajakda ham jamiyat taraqqiyotiga o‘zining munosib hissasini qo‘shishda davom etadi. 30 yil davomida shakllangan tajriba va to‘plangan bilimlar partiyani yanada mustahkam qilishi, uning saflarida fidoyi insonlar safi kengayib borishi shubhasiz.