Telegram channel "Mohichehra A’zam 📚" — @boqiy_darbadarr

Mohichehra A’zam 📚

31 Jan, 15:56

Forward from: Quyosh taraflarda

#Diqqat_e‘lon

– Turk tili online kursiga qabul e‘lon qilaman. Aslida bir oy kutishim kerak edi. Ammo may oyidagi imtihonlarga ulgurish uchun guruhni hozir ochishga qaror qildim.

– Darslar haftada uch kun va qo‘shimchasiga yakshanba – konuşma kunlaridan iborat bo‘ladi. Soati va kunlarini kelishamiz.

– O‘zim hamma darsliklarni ancha avval tugatganimga qaramasdan, yaqinda imtihon topshirdim. Uning javoblari bir oydan keyin chiqadi. Shu sabab faqat menga ishongan va til o'rganishni istaganlarni taklif qilaman.

– Tajribam nol emas, anchadan buyon yordamchi o‘qituvchiman. O‘zimga ishonmasam e‘lonni yozib ham o‘tirmasdim.

– Kurs narxi: 200 ming so‘m. Va darslar 5-fevralda boshlanadi. Murojaat uchun: @Xayitova_Shahlo

@quyoshtaraflarda

78 0 1 5

Mohichehra A’zam 📚

28 Jan, 19:18

#nazm

O‘sha — meni hech kim sog‘inmagan shom
Avto bekatida hayrona turdim.
Boshimni ko‘tarib boqdim bir zamon.
Qarshimda bir yigit, bir qizni ko‘rdim,

Yigitning paltosi... Yo‘q, yodimda yo‘q...
Aniq, ko‘m-ko‘k edi qizning paltosi.
Bellarini quchgan belbog‘i ham ko‘k.
Hatto ko‘m-ko‘k edi to‘rtta tugmasi...

Yigitning ko‘zlari... Eslay olmayman...
Oshkor jaranglatib pinhon o‘yini,
Qizning ko‘zlarida yoqardi gulxan.
Erkalik va ishqning ma’sum quyuni…

Yigitning yuzida bilmayman, nima...
Ammo qizning yuzi qarshimda ayon:
Uni ko‘mgan edi gulgun shafaqqa
Muhabbat — eng moviy pokiza osmon...

Qor bo‘lsa yog‘ardi, qizning boshidan
Kumush tangalarni ayamay sochib,
Shamol titar edi — ko‘zi, qoshiga
Manglayiga tushgan bir tutam sochin.

Yigit... Yigit bilan qancha ishim bor!
Ammo qiz yigitni shunday suyardi.
Ki, goh termulardi hazin, beozor,
Goho qo‘llarini ushlab qo‘yardi.

Toshkentday shaharda, balki dunyoda
Yagona — hammadan go‘zal edi qiz.
Chiqmasa ham telba orzum ro‘yobga,
Bo‘zlab qarshisiga cho‘kkim keldi tiz!

Yigit... Ammo nega seni o‘ylayman,
Hozir ham havasdan muzlaydi etim...
Men qorli bekatda vayron turgan shom,
Sen mendan — hammadan baxtiyor eding.

Usmon Azim

@boqiy_darbadarr

494 0 10 22

Mohichehra A’zam 📚

28 Jan, 08:04

Forward from: Shohsanam's blog

Oʻz qadrini qaytarishga boʻlgan soʻngi urinish - Lev Tolstoy “Anna Karenina”

Bu roman – inson ehtiroslari, axloqiy tanlovlari va ijtimoiy qoidalar o‘rtasidagi ziddiyatlar haqidagi chuqur mulohazadir. Uning har bir sahifasi shunday haqqoniylik bilan yozilganki, o‘quvchi go‘yo qahramonlarning yonida yashayotgandek his qiladi.

Anna Karenina obrazida Tolstoy nafaqat ayolning erkinlik uchun kurashini, balki insonning o‘z-o‘ziga qarshi ichki kurashini ham tasvirlaydi. Annaning qiyofasi – bu go‘zallik va zaiflikning, kuch va ojizlikning bir butunligi. Yuksak aql va olijanob qalbning bir tanada birlashuvi fojiadir, degan jumla Anna uchun aytilgandek goʻyo. U sevgi va ehtiros izlaydi, ammo bu ehtirosning qiymati uning butun hayotini vayron qiladi. Anna erkinlikka intiladi, ammo u o‘zi yashayotgan jamiyatning cheklovlari va qoidalariga mahkum ekanligini oxir-oqibat anglaydi. Uning fojiaviy o‘limi – bu faqat bir ayolning fojiasi emas, balki ijtimoiy me’yorlarning inson qalbiga qilgan zo‘ravonligining ramzidir. Annaning harakati – bu individualizmning o‘sha davr jamiyatidagi qotib qolgan qonunlarga qarshi isyoni. Ammo bu isyon muvaffaqiyatsizlikka mahkum: u na erkinlikka, na baxtga erisha oladi. Uning o‘zini poyezd ostiga tashlashi – bu hayotdan qochish emas, balki insoniy qadr-qimmatni qaytarib olishga bo‘lgan so‘nggi urinishi.

Asar o‘z davrining jamiyatiga achchiq tanqid bilan qaraydi. Erkak va ayolning jamiyatdagi mavqei orasidagi notenglik shunchalik aniqlik bilan ochilgan: erkaklar sevgi va ehtirosda erkinlikka ega bo‘lib, xatolari kechiriladi, ayollarning kichik “gunohi” esa butun jamiyat tomonidan qoralab tashlanadi.

Vronskiy o‘z ehtiroslariga bo‘ysunib, sevgini shiddat bilan qabul qiladi, ammo Annaga bo‘lgan sevgisining mas’uliyatini oxirigacha ko‘tara olmaydi. Uning g‘urur va o‘ziga ishonchsizligi uni sevgan insonidan uzoqlashtiradi. Bu sevgi oxir-oqibat ikki tomonlama mag‘lubiyatga aylanadi: Anna hayotini yo‘qotadi, Vronskiy esa o‘z ruhiy tinchligini abadiy boy beradi.

Konstantin Levinning izlanishlari esa asarning boshqa falsafiy qirrasi sifatida gavdalanadi. Levin obrazida Tolstoy insonning hayot mazmuni va mohiyatni anglashga bo‘lgan intilishini ochib beradi. Levinning ichki kurashlari, uning tabiat va inson mehnatiga bo‘lgan ehtiyojini o‘qish o‘quvchini majburiy tanlovlar haqida chuqur o‘ylashga undaydi. Levin va Kiti o‘rtasidagi munosabatlar Annaning sevgisiga qarama-qarshi bo‘lib, baxtni oddiylik va sadoqatda topish mumkinligini ko‘rsatadi. Ammo bu baxt ham mukammal emas, chunki Levinning falsafiy izlanishlari davom etaveradi.

Tolstoy o‘z asarida sevgi va ehtirosning ikki xil tusini tasvirlaydi. Bir tomondan, ehtirosli sevgi halokatli kuchga ega. Anna va Vronskiyning hikoyasi shuni ochiq ko‘rsatadi. Ikkinchi tomondan, ma’naviy uyg‘unlikka asoslangan sevgi insonning hayotini boyitishi va ma’noga to‘ldirishi mumkin. Levin va Kiti o‘rtasidagi munosabatlar bu fikrga misol bo‘lib xizmat qiladi. Biroq Tolstoy buni absolyut haqiqat sifatida ko‘rsatmaydi, balki sevgi va hayotning ko‘p qirrali ekanligini ta’kidlaydi.

Asar syujeti nafaqat qahramonlarning shaxsiy fojialari, balki jamiyatning asosiy muammolari haqida ham fikr yuritishga undaydi. Tolstoy inson erkinligining chegaralarini, axloqiy tanlovlarning murakkabligini va ijtimoiy qadriyatlarning inson hayotiga ta’sirini o‘rganadi.

Bu nafaqat sevgi haqidagi hikoya, balki insoniyatning umidsiz izlanishlari, tanlovlarning halokatli oqibatlari va jamiyatning rad etuvi haqida yozilgan og‘ir darsdir. Bu asar nafaqat o‘qiladi, balki o‘ylashga, his qilishga va baholashga majbur qiladi. Anna bilan birga tushkunlikka tushasiz, Levin bilan birga hayotning ma’nosini izlaysiz va oxirida hayotning achchiq, ammo haqiqatga to‘la ma’nosini his qilasiz.

P.s¹: Jamiyat Vronskiylarga toʻlib yotibdi, erkaklarning katta qismi munosabatlar va sevgining maʼsuliyatini oxirigacha koʻtarolmaydi. Natijada Annalarimiz soni ortib boradi.

P.s²: shu kitobni oʻqisam, kinosini koʻrsam, yakunida Annaga qoʻshilib oʻlgim keladi.

@shohsanamdan

546 0 6 16

Mohichehra A’zam 📚

26 Jan, 20:19

#taqriz

📌 Erkin A’zam. Bayramdan boshqa kunlar

Bu asar shu yaqin zamonimizda yashagan, bir orzusi osmonda uchish bo‘lgan-u, ammo taqdirmi kajraftor, turmushmi bemaza bo‘lib yerda qolib ketgan avtobus haydovchisi Bakir ismli siz-u bizdek oddiy bir yigit haqida. Toshkentning har bir bekatida Bakirning alohida xotiralar bor. Asar davomida ular bilan tanishib boraverasiz.

Erkin A’zamning qahramonlari “Anoyining jaydari olmasi”ni aytasizmi, “Pakananing oshiq ko‘nglini”mi yoki “Otoyining tug‘ilgan yili”nimi farqsiz– hammasi nihoyatda oddiy, dilingizga yaqin, shu bilan birga ko‘ngli ne bir ajib, ne bir g‘aroyib-u ne bir keng bo‘lgan, g‘ururi osmon, andishali odamlar. Qolaversa, Erkin A’zam ijtimoiy hayot fonida falsafiy qarashlarini ham sodda tarzda aytib ketishga usta.

Bizning qahramonimiz Bakir ham shu xil odamlardan. Taqdirni qarangki, yigitlik ishqibozligi bilanmi, yo azbaroyi muhabbatdanmi baland dorga osildi va kutilmaganda dorning o‘zi pastga tushib, Bakirning boshiga baxt qushi qo‘ngandek bo‘ldi. Qo‘ndi-yu, o‘zi istagan kuyni chala boshladi. Ammo bunday yashashning ham chegarasi bor. Zotan qushimiz har gapida andishasizlik bilan ta’kidlaydigandek "Ha, nima qipti?” bilan umr kechirib bo‘larmidi.

Batamom ikki xil muhitning odamlari bo‘lgan bu juftlikning sovuq oshdek turmushi misolida o‘tgan asrning 80-yillaridagi ijtimoiy muhit, fikriy va qadriyatlar tomonlama odamlarning bo‘linishlari ochib berilgan. Bir guruh hali o‘zbekligini, tilini, vijdonini unutmagan bo‘lsa, ikkinchi guruh esa “yallama yorim”dan boshqani bilmaydigan, turfa xil tillar aralashmasidan o'zgacha lison yasab olgan, o‘zini haddan tashqari zamonaviy va madaniyatli hisoblaydigan-u, or-nomusni yamlamay yutganlar guruhi. Bu davr o‘zining Safuradek xor bo‘lgan, sirti yaltiroq ichi qaltiroq ayollarini, Barnodek suvilonlarini, Chinnibekdek tovlamachilarini, Bargidadek muloyim supurgilarini-yu Basiradek hayosizlarini yetishtirdi.

“Bayramdan boshqa kunlar”ni, umuman, Erkin A’zamning asarlarini mutlaqo o‘qing va ko‘ngil mulkingizni boyiting, kitobxon. Aytgancha, kitob sifati va tahrir yaxshi ekan.

✍ Mohichehra A’zam

@boqiy_darbadarr

576 0 7 20

Mohichehra A’zam 📚

25 Jan, 18:58

Axloq va or-nomus haqida gap ketganda faqat ayollar haqida gapirganlarning hammasi axloqsiz va nomussizdir!

© Frida Kahlo

@boqiy_darbadarr

676 0 9 38

Mohichehra A’zam 📚

21 Jan, 13:42

#nimadir

Shunday odamlar bo‘ladi: kishiga azob beradigan darajada samimiy, sodda. Ularning yonida o‘zingning naqadar kir ekanligingni sezganing sabab ham azoblasan kishi...

***

Anna Karenina sindromi bor narsa. Bu sindromni o‘zida sezgan ayol sevmasin, sevilsin faqat. Shunda hayoti yaxshiroq kechadi. Bunday ayolning muhabbati oxir-oqibat baribir fojiaga aylanadi va o‘zini yakson qiladi.

@boqiy_darbadarr

1.3k 0 8 34

Mohichehra A’zam 📚

19 Jan, 18:32

#taqriz

📌 Shayx Muhammad Sodiq Muhammad Yusuf. Yaxshilik va silayi rahm. (1-juz)

Ushbu kitob Husayn ibn Hasan Marvaziy rahmatullohi alayhining “Kitobul birri vas-sila”(Yaxshilik va silayi rahm) kitobining Shayximiz tomonidan qilingan ta‘lifidir.

Kitobni tushunmoq uchun eng avvalo “birr” va “sila” so‘zining ma’nolarini bilib olish lozim. Arab tilida “birr“ sodiqlik, toat, bog‘lash, isloh qilish, odamlarga keng miqyosda yaxshilik qilish degan ma’no anglatadi. Birrning bundan tashqari ham ko‘plab ma’nolari bor va o‘quvchiga yengillik bo‘lishi uchun kitobda bu so‘z “yaxshilik” ma’nosini ifodalashi aytiladi.

Xo‘sh, yaxshilik nima? Biz o‘z-o‘zimizcha yaxshilik qilyapman deb o‘ylayotgan ishlar aslida islomdagi yaxshilikka mosmi? Alloh taolo “Baqara” surasining 177-oyatida yaxshilikka quyidagicha ta’rif beradi:

• Iymon keltirish (Allohga, oxirat kuniga, farishtalarga, Kitobga, Nabiylarga iymon keltirish);

• Mol-dunyosidan nafaqa qilish (Yaqin qarindoshlariga, yetimlarga, miskinlarga, yo‘qsil yo‘lchiga, tilanchilarga va qul ozod qilishga);

• Namozni to‘kis ado etish;

• Zakot berish;

• Ahdiga vafo qilish;

• Yo‘qchilik, qiyinchilik va shiddat vaqtida sabr qilish.

Kitobda yuqoridagilardan tashqari ham yaxshilikning turlari, sifatlari oyat va hadislar bilan go‘zal bir tarzda anglatilgan va odamlar o‘zlari o‘ylab chiqargan narsalar yaxshilik bo‘la olmasligi alohida e’tirof etilgan.

“Sila” esa qo‘shish, bog‘lash, jamlash, payvandlash ma’nolariga ega. Ulamolar istilohida esa asosan silayi rahm, ya’ni qarindoshlarga va yaqin kishilarga yaxshilik qilishga “sila“ deyiladi.

Kitobda bizga yaqin kishilarning va qarindoshchilikning eng birinchi bo‘g‘ini ota-ona hisoblanib, ularning farzand ustidagi haqlari biz o‘ylagandan nihoyatda ko‘p ekanligi, bu haqni ota-onani qul holatida topib olib ozod qilsagina uzish mumkinligi, boshqa hech bir vaziyatda ularning haqlarini ado etib bo‘lmasligi, ota-ona kofir bo‘lganda ham farzanddagi haqlari o‘sha-o‘sha bo‘lishi aytiladi. (Amina Shenliko‘g‘lining qaysidir kitobida ota-onasi Islomda emasligi uchun ularga butun zahrini sochib, do‘zaxidan olib do‘zaxiga solgan qiz obrazi bormidi?!) Undan tashqari farzandning ham ota-onada alohida haqlari(chiroyli ism berish, go‘zal odobli qilib tarbiyalash, nafaqasidan bo‘yin tovlamaslik, balog‘atga yetganda uylantirish/uzatish) bo‘lib, ularni ado etishga chaqiriladi.

Kitob juda ko‘plab e’tiborsiz qoldiradigan narsalarimizni sodda tarzda tushuntirib, go‘yo chaynab og‘zimizga solib qo‘yadi. Uni yutib, amalimiz bilan mustahkamlash esa o‘zimizda qoladi.

Mutolaadan charchamang, kitobxon!

✍ Mohichehra A’zam

@boqiy_darbadarr

1.4k 0 11 24

Mohichehra A’zam 📚

15 Jan, 18:18

#nimadir

Masalan, insonni birgina yaxshi so‘z bilan xursand qilish mumkin. Hatto, o‘limdan saqlab qolish mumkin. Lekin o‘sha so‘zni aytmaslik haqiqiy razillik.

@boqiy_darbadarr

1.9k 0 4 41

Mohichehra A’zam 📚

13 Jan, 19:44

G‘urbat

Shu qadar achchiq
Ki ne bo‘lsa ichimda.
Bari menga begona,
Bari boshqa bichimda.

Eriyman bora-bora,
Har umidga alvido,
G‘urbat o‘zligimni-da
Bitirgandir ichimda!

Na orzum, na amalim,
Yaralangan bir qo‘lim,
Men g‘urbatda emasman,
G‘urbat mening ichimda!

“Turk she’riyati antologiyasi“. Kamoliddin Kamu

@boqiy_darbadarr

1.9k 0 8 20

Mohichehra A’zam 📚

12 Jan, 19:37

Pirnashrdan yana sovg'alar keldi.

Avval ham Erkin A’zamning “Gonoluluga elchi“ va Rizvon Oqlonning “Uzoq tuzoqlar” kitoblarini yuborishgandi)

Nashriyot ishlariga omad tilab qolamiz.

@boqiy_darbadarr

1.7k 0 3 25

Mohichehra A’zam 📚

11 Jan, 17:11

#nimadir

Xudoning dargohi keng. Bizning miyamizdagi Xudo tushunchasi tor.

@boqiy_darbadarr

1.6k 0 6 18 32

Mohichehra A’zam 📚

10 Jan, 22:46

Sardor Rahimxon — Yo Rab (OST - Janob hech kim / Мистер Х) 2009… — Central Asia

03:32

#music

Harchand mohi qurbon kelodur,
Har dam qilurman jonimni qurbon...

@boqiy_darbadarr

1.7k 0 17 1 10

Mohichehra A’zam 📚

8 Jan, 17:01

#taqriz

...Turgin va badar ketgin!
(“...Endi sen to qiyomatga qadar betinim daydishga mahkum etilding”, deyildi unga.

“Hamda sening qiladigan ishing – hech narsa, hech narsa, faqat hech narsa”, deyildi unga).

📌 Isajon Sulton. Boqiy
darbadar

Asar batamom umumbashariy mavzularni qamrab oladi. Tashqaridan qaraganda allaqanday bir-biriga deyarli bog‘lanmagan hikoyalardan tashkil topgandek ko‘rinsada aql yurituvchi kishi bularning qay nuqtada to‘planishini darrov ilg‘aydi.

Dunyo odamlar bilan dunyo bo'lib turibdi. Insonni esa inson qilib turadigan narsalar bor: tili, millati, dini, qadriyatlari, kelib chiqishi, qayergadir xosligi. Ammo ma’lum bir ona hujayradan o‘stirilib, tashqi muhit ta’siriga chidamli, ko‘rinishi odamdek, lekin odamdan ming karra ko‘proq umr ko‘radigan, kesilgan joyini yana o‘zi tiklab oladigan kuch va aql sohibi etilib sun’iy urchitilsachi? Xudoning irodasiga qarshi o‘laroq undirilgan bu mahluqlarning qanchalik jirkanch siyosiy-iqtisodiy maqsadlar yo‘lida ishlatilishi va butun yer yuzini hech kimlar bosib ketishini bir tasavvur qiling-a!

Zamin uzra yotgan kichik bir maysadan tortib falakda kezib yurgan aql bovar qilmas ulkanlikdagi sayyoralargacha, bir qush o‘z rizqini timsohning tishlari orasidan olib yeyishigacha, maysaning bosh ko‘tarishigacha ajiyb bir qonuniyatga bo‘ysunar ekan, bir-biridan sarhil meva-yu taomlar unga atalgan ekan, dinlar u uchun yuborilgan, butun kurrayi-arz yolg‘iz u uchun aylanar ekan nega endi inson zoti bu silsilani buzishga harakat qiladi? Ilm-fanmi? Yo‘q, aslo. Ilm-fan Uning izmiga qarshi chiqilib amalga oshirilmaydi.

Takabburlik–odam bolasi boshiga solmagan kulfat qoldimikan o‘zi? Uzoq o‘tmishda bir muborak zotni kibri sabab turtib o‘tgan zamindoshimizning umrboqiyligi aslida dahshatli tavqi la'nat ekanligini, dunyodan o‘z vaqtida ketmoq baxt ekanligini nega anglamaydilar?

Asarni o‘qishingizni qattiq tavsiya qilardim. Saviya jihatdan hozir ko‘klarga ko‘tarilayotgan kitoblarga dam beradi.

P/s. Aytgancha, kanalim linkining bu asarga umuman aloqasi yo‘q.

✍ Mohichehra A’zam

@boqiy_darbadarr

1.8k 0 3 5 16

Mohichehra A’zam 📚

8 Jan, 15:14

1.3k 0 2 2

Mohichehra A’zam 📚

8 Jan, 15:13

“Izlam“ taqdimotidan bizga ham taklifnoma keldi, azizlar!

Hammasi yaxshi-yu, ammo viloyatda yashab shunday tadbirlardan qolib ketishing yomonda)

Xullas, xalqim, meni o‘rnimga siz boring! Adabiy davradan zavq oling. Zotan, “Izlam” katta izlanishlari ila hali daryo bo‘lib oquvchi ijodkorlarning kitoblari.

@boqiy_darbadarr

1.4k 0 4 8 13

Mohichehra A’zam 📚

7 Jan, 19:02

#shu_gap

Ba’zi odamlarni chetdan ko‘rib ixlos qo‘yasiz, sababini o‘zingiz ham anglamagan holda hurmat qilasiz. Keyin esa... Yo‘q, chetdan hurmat qilib yuraverganingiz ma’qul.

@boqiy_darbadarr

1.3k 0 5 10 42

Mohichehra A’zam 📚

4 Jan, 16:38

#eski_yoziqlar

***
Tun o‘ylash, mutolaa qilish, musiqa tinglash uchun eng qulay vaqt.

17.06.2022

***
Yarim tunda birovga nega haliyam uxlamading deb hech qachon savol bermang. Qayerdan bilardingiz balki siz yonidan ham o‘tmagan dardlar, o‘ylar, o‘zi bilan murosasiz bahslar, javobi yo‘q savollar qiynayotgandir uni.
Qil sig‘mayotgan yuragiga farosatsizlik bilan bergan savolingiz nimasi?!

19.06.2022

***
Yaxshiyam Xudo bor, yaxshiyam so‘z bor, yaxshiyam she’r bor...va yaxshiyamki, hech kimdan so‘ramay nafas olasan.

18.07.2022.

***
Uzluksiz kitob o‘qimang. Bir kitobni tugatgach biroz dam ham olish kerak ekan. Oradan bir kun ham o‘tkazmay yangi kitob boshlash baribir miyani charchatar ekan.

27.07.2022

***
Xuddi och qolgan odam ovqatlangach nafsi qonib, xotirjam bo‘lgani kabi men ham hozir kitob o‘qib o‘zimni shunday his qilyapman.

12.08.2022.

***
Hali oladigan, o‘qiydigan kitoblari, o’rganadigan ilmlari ko‘pligini o‘ylab ham yashagisi keladi odamning.

19.08.2022.

***
Ko‘chada she’r o‘qib, kulib ketyotganimda odamlarning jinniga qaragandek qarashlariga maza qilamanda. Battar jinim qo‘ziydi. Ovozimni yanayam balandlatib o‘qiyman. Tavba-ee, nimaga hamma ko‘chada jiddiyni yoqib, sipo yurishi kerak. Kulib yurganlarga tentakdek qarashadi. Menga esa baribir lekin.

03.09.2022

***
O‘zingni o‘zing tushunmasliging fojia. Buning oqibatida yaqinlaringni xafa qilib qo‘yishing ikki karra fojia...

08.09.2022

***
11.09.2022. soat 23:¹³. Chigirtkalar chirillayapti. Osmonda oy. Yonida mittigina yulduz. Havo salqin. Haqiqiy kuz havosi. Shunday paytlarda diling allanechuk orziqib, entikib ketadida.

***
Engashib yashab bo‘lmaydi. Engashib yashamayman!!

14.09.2022.

***
Qorong‘u dunyoni nurga to‘ldirgan kitoblar, yaxshiyam borsizlar!

16.09.2022.

***
Bugungi kunim internetsiz o‘tdi. Mehmon kuzatdik. Kun bo‘yi onam bilan bo‘ldim. Rosa kuldik, dildan yayrab suhbatlashdik, hazillashdik. Eeeh, bu hislarni hech narsa bilan tenglashtirolmayman.
Odatda jisman emas, aqliy va ruhiy charchayman. Bugun aksi bo‘ldi. Ruhim yayradi, jismim charchadi. Lekin bu charchoqdan rohat tuyayapman. Bilasizmi, ruh charchog‘i oldida jismning toliqishi bayramdek gap ekan.

18.09.2022.

***
“Farosat“ degan ilova bo‘lganida ko‘pchilikning miyasiga o‘rnatardim.

19.09.2022.

***
Hozir bookbloger bo‘lish uchun kitoblarni chiroyli rasmga olish kifoya

23.09.2022.

***
Sokin tun bilan allaqayerga daydib ketishni istayman.
Yolg‘iz, faqat va faqat yolg‘iz....

29.09.2022.

✍ Mohichehra A’zam

@boqiy_darbadarr

1.8k 0 10 6 20

Mohichehra A’zam 📚

3 Jan, 20:04

📌 Men tan olaman:

– Yangi kitoblarni hidini sevaman.(eski kitoblarni hidida nimadir bor. Allergiyamni qo‘zg‘ab aksirishimga sabab bo‘ladi.)
– Kitob o‘g‘irlaganman.
–Narsa yeb kitob o‘qiy olmayman.
–Istalgan narsani xatcho‘p qilib ishlataveraman.
–Kitob olaman deb ko‘pincha abedlik pullarimdan kechib och qolganman.
– Kimlarnidir majburlaganman menga kitob sovg‘a qilishga.
– Kitob sovg‘a qilishni emas, sovg‘aga olishni yaxshi ko‘raman.
– Kitob haqida suhbatlashishni sevaman.
– Klassik asarlar shaydosiman.
– Yumshoq muqovali kitoblar unchalik yoqmaydi. Qattiq muqovasevarman.
– She’r o‘qish jon-u dilim
– Hozircha zamonaviy kitob javonim yo‘q.(onamning eski uslubdagi javonini o‘zlashtirganskiy)
– Shovqin bo‘lsa ham kitob o‘qiy olaman.
– Bayram, to‘y va tadbirlarga borishdan ko‘ra uyda tinchgina kitob o‘qishni ma’qul ko‘raman.
– Zamonaviy turk adabiyotini va motivatsion, psixologik kitoblarni yoqtirmayman.
– Badiiy asarlar eng ko‘p yoqadi.
– Juda ko‘p bookbloglarni kuzataman.
– Kitoblarni chiroyli rasmga olishni sevaman.(odatda lekin yaxshi ololmayman suratga😐)
– Audio kitob umuman eshitmaganman, juda yomon ko‘raman buni. Miyam birovning ovozini qabul qilolmaydi.
– Pdf kitoblarni maktab paytda o‘qirdim. Hozir deyarli pdf kitob o‘qimayman.
– Kitob do‘koni yonidan o‘tsam olmasam ham bir kirib o‘taman.(pulim bo‘lsa-ku, olmasdan chiqmayman. Hatto u so‘nggi pulim bo‘lsayam)
– Galeriyamning katta qismini kitoblar rasmlari va videolari egallagan
–Diniy kitoblar ham o‘qiyman.
– Boshqa tilda ham kitob o‘qish eng katta orzularimdan biri
– Doim o‘zim bilan kitob olib yuraman
– Kitoblar asosida ishlangan kinolarni sevaman

@boqiy_darbadarr

1.6k 2 14 35 38

Mohichehra A’zam 📚

30 Dec 2024, 19:23

#yilsarhisobi 2024

2024-yilni yaxshi kayfiyatda boshlamagan bo‘lsamda ajoyib voqealarga to‘la bo‘ldi. Avvalo fevraldan iyunga qadar kitob do‘konida ishlash orzuyim amalga oshdi. Institutni tamomlab, bakalavr darajasiga ega bo‘ldim. Ishga kirdim. Oilamga biroz bo‘lsada moliyaviy tomondan yordamim tega boshladi. Hali loyiq bo‘lmasamda endi meni ham ustoz deyishmoqda) Sentyabr-oktyabr oylarida milliy sertifikat uchun tayyorlandim va uni qo‘lga kiritdim. Hozir o'tgan yili boshlab davom ettirmaganim turk tilini yana o'rganyapman. 2025-yilda turk tilidan ham sertifikat olmasam bo‘lmaydi)

Kecha yil davomida sotib olgan va sovg‘a qilingan kitoblarni sanab ko‘rdim. Naq 90 ta chiqdi. Qoyilmisiz? O‘zim ham hayratlandim, rosti) Quyida esa o‘qigan kitoblarim:

📌 Yanvar

1. Lev Tolstoy – Uch o‘lim. (hikoyalar to‘plami)
2. Jan-Dominik Bobi – Skafandr va kapalak.
3. Yeji Koshinskiy – Rangin qushcha.
4. R. N. Guntekin – Tamg‘a.
5. R. N. Guntekin – Xazonrezgi.
6. Sara Jo – Londondan muhabbat ila.
7. Devid Nikolls – Bir kun. Bir muhabbat tarixi.

📌 Fevral

8. Lev Tolstoy – Anna Karenina. (1-qism)
9. Lev Tostoy – Anna Karenina. (2-qism)
10. Chingiz Aytmatov – Somon yo‘li.

📌 Mart

11. Anna Dostoyevskaya – Xotiralar.
12. Etel Lilian Voynich – So‘na.
13. Herman Hesse – Cho‘l bo‘risi

📌 Aprel

14. Onore de Balzak – Dahriyning ibodati.
15. Ivan Turgenov – Otalar va bolalar.
16. Tadeush Dolenga-Mostovich – Tabib.
17. Ulug‘bek Hamdam – Yaxshiyam, sen borsan.
18. Aziz Said – Vaqt manzili.

📌 May

19. Xulio Kortasar – Ishg‘ol qilingan uy.
20. Asli Sanjar – Haram.
21. Andrey Platonov – Jon.
22. Lev Tolstoy – Muhammad(s.a.v) o‘gitlari•Maktublar•Iqrornoma.
23. Klayv Steyplz Lyuis – Nariya saltanati.(Arslon, jodugar va kiyim javoni)
24. Erix Mariya Remark – G‘arbiy frontda o‘zgarish yo‘q.

📌 Iyun

25. Murod Chovush – Hech.
26. Jon Duglas, Mark Olsheyker – Qotilning psixologik portreti.
27. Shin Kyong Suk – Onamni asra.

📌 Iyul

28. Shayx Muhammad Sodiq Muhammad Yusuf – Vasatiya – hayot yo‘li.
29. Murod Muhammad Do‘st – Lolazor.
30. Ch. Aytmatov va M. Shoxonov – Cho‘qqida qolgan ovchining ohi zori.
31. Teodor Drayzer – Jenni Gerxardt.
32. Herman Hesse – Siddhartha.
33. Xuan Rulfo – Pedro Paramo.

📌 Avgust

34. Ernest Xeminguey – To‘qchilik va yo‘qchilik
35. Harper Li – Mazaxchini o‘ldirish
36. Tara Vestover – Talaba.

📌 Sentyabr

37. Odil Yoqubov–Ulug‘bek xazinasi(qayta mutolaa).
38. Erkin Vohidov–Ruhlar isyoni.
39. Abdulla Oripov–Sohibqiron.

📌 Oktyabr

40. Luqmon Bo‘rixon–Jaziramadagi odamlar.
41. Tog‘ay Murod–Yulduzlar mangu yonadi.

📌 Noyabr

42. Chingiz Aytmatov–Asrga tatigulik kun.
43. Fyodor Dostoyevskiy–Telba.

📌 Dekabr

44. Anton Chexov–Kuchuk yetaklagan xonim.
45. Jianna Molinari–Bu yerda hamma narsa bo‘lishi mumkin.
46. Tomas Harris–Qo‘zichoqlar sukunati.
47. Isajon Sulton–Boqiy darbadar.

Yangi yil barchangizga omadli va barakotli kelsin. Sizlarga cheksiz hurmat bilan Mohichehra

@boqiy_darbadarr

1.9k 0 14 17 21

Mohichehra A’zam 📚

29 Dec 2024, 19:37

Jahonning shodligi yig‘ilsa butun,
Do‘stlar diydoridan bo‘lolmas ustun.

Bugungi kun super promax darajada zo‘r o‘tdi. Chunki Shahlo va Shohsanam bilan ko‘rishdik. Ba’zan hammamiz uchun o‘tmay qoladigan vaqt bugun suvdek oqdi. Kulgu kulguga, suhbat suhbatga ulandi. Mavzular turfa xil – siyosat, ta’lim, din, munosabatlar, biznes, kitob, psixologiya, sevgi...

Rasmdagi Shahloning uyida qolib ketib yana borib kelgani alohida mavzu.😄
Kitoblar tarixi esa undan ham qiziq) “Urush va tinchlik” ni 5-6 oy oldin Toshkentdagi bir obunachim menga yetkazishi uchun Shahloga bergan va nihoyat bugun oldim. “Kürk mantolu madonna”ni esa 1 oylar avval @quyoshli_kitoblarr dan xarid qilgandim. Bu ham Shahloning o‘zida turgandi.

Xullas, esda qolarli kun uchun rahmat, qizlar. Yaxshiki, borsiz!

P/s. Aytgancha, yuqoridagi videoni ko‘rdingizlarmi o‘zi?

@boqiy_darbadarr

1.4k 1 2 22 15

Продам канал с доходом 138090

TGAlertsBot

Telegram Analytics

Mohichehra A’zam 📚

Channel's geo and language

Category

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

Mohichehra A’zam 📚

1 631

Popular in the channel

Site language

Продам канал с доходом 138090

TGAlertsBot

Telegram Analytics

Mohichehra A’zam 📚

Channel's geo and language

Category

1 631

Popular in the channel