Nega yigʻlayapsan yana yuragim,
Yana nima boʻldi, yana ne alam?
Oʻzingniku boʻlar boʻlganing yetmay,
Qiynab yubordingku axir, meni ham!

Kimga kerak sening fidoyiliging,
Yonib sevishlaring kimga ham kerak?
Oʻzingni ham ozroq oʻylagin nodon,
Oʻzingni ham ozroq yaxshi koʻr, yurak!

Ular uchun urding, yonding ular deb.
Ular kimlar uchun kuylamoqdalar?!
Sevging evaziga seni koptok deb,
Zerikkanda tepib oʻynamoqdalar!

Shoʻrlikkinam mening, xokisorginam,
Oʻzini yer qilib qoʻygan falagim!
Kel, shifo soʻraymiz Allohdan birga,
Soʻng undan oʻzgani dema, yuragim!!!

Kechir, yana senga tilasam sabr,
Tomir-tomiringda ogʻriq, bilaman.
Xastalanib qolsang bir menga jabr,
Sen urmayin qoʻysang qandoq qilaman?!

Sadoqatli doʻstim, kel oʻzimga kel,
Koʻnglimni ham kechir, koʻp berdi ozor!
Hali sevaman deb menga vaʼda ber,
Ishon, bu dunyoda arzirlar ham bor!

Malika Tavfiq