Afrika, Avstraliya va Osiyoning tropik va subtropik mintaqalari boʻylab loyqa botqoqlar va daryolarda tarqalgan Loyqachilar (Oxudercinae) kenja oilasi quruqlikni sevuvchi baliqlar boʻlib, ular quruqlikda suvda boʻlgani kabi, hatto, undan ham koʻproq vaqt oʻtkazishi mumkin. Ularning uzunligi 30 sm ga yetishi mumkin. Koʻpayish vaqtida erkak individlarda qizil-yashil yoki koʻk rangdagi dogʻlar paydo boʻladi, bu esa oʻz navbatida urgʻochilarni jalb qilish uchun xizmat qiladi. Qorin va koʻkrak suzgichlaridagi muskullar yaxshi rivojlangan boʻlib, quruqlikda asosan ularga tayangan holda harakat qiladi.
Ajablanarli tarafi, loyqachi baliqlarning baʼzi turlari daraxtlarga ham chiqa oladi.
Koʻplab erkak loyqachilar uchun juft topish uning qanchalik baland sakrashiga ham bogʻliq. Kuchli dumiga tayanib imkoni boricha balandga sakrashga harakat qiladi.
Ular oʻz hududlarini jiddiy himoya qilishadi, shuning uchun areallari bir-birga juda yaqin boʻlgan ikki erkak loyqachilar oʻrtasidagi duellar odatiy hol hisoblanadi.
Loyqachi baliqlar turli joylarga chuqurchalar qazishadi. Bu chuqurchalar yirtqichlardan himoya qilish va tuxum qoʻyish uchun ham ishlatiladi. Bundan tashqari, ushbu chuqurchalarda maxsus havo kamerasi ham hosil qilishadi. Bu chuqurlarni torpedo shaklidagi tanalari yordamida emas, balki ogʻizlar bilan loyni yigʻib, bir marta tupurish orqali qazishadi.
Loyqachi baliqlarning boshi tepasida ikki boʻrtib chiqqan koʻzlari mavjud. Mazkur koʻzlar buqalamunlarniki singari bir-biridan mustaqil ravishda harakatlana oladi va bu baliqlarga ajoyib periferik koʻrish imkonini beradi. Buning natijasida ular deyarli 360 darajani koʻra oladi. Koʻz muskullari har qisqarganida, suyuqlik bilan toʻldirilgan dermal boʻshliqqa tushadi, bu esa koʻzlarni nam holatda saqlab turish imkonini beradi. Boʻrtib chiqqan koʻzlari ularga zich loyda ovqat topishga yordam beradi va bir vaqtning oʻzida suv ostida va suv ustida koʻrishga zamin yaratadi.

https://t.me/biologiciq