Nega yig‘layapsan yana yuragim,
Yana nima bo‘ldi, yana ne alam?
O‘zingniku bo‘lar bo‘lganing yetmay,
Qiynab yubordingku axir, meni ham!

Kimga kerak sening fidoyiliging,
Yonib sevishlaring kimga ham kerak?
O‘zingni ham ozroq o‘ylagin nodon,
O‘zingni ham ozroq yaxshi ko‘r, yurak!

Ular uchun urding, yonding ular deb.
Ular kimlar uchun kuylamoqdalar?!
Sevging evaziga seni koptok deb,
Zerikkanda tepib o‘ynamoqdalar!

Sho‘rlikkinam mening, xokisorginam,
O‘zini yer qilib qo‘ygan falagim!
Kel, shifo so‘raymiz Allohdan birga,
So‘ng undan o‘zgani dema, yuragim!!!

Kechir, yana senga tilasam sabr,
Tomir-tomiringda og‘riq, bilaman.
Xastalanib qolsang bir menga jabr,
Sen urmayin qo‘ysang qandoq qilaman?!

Malika Tavfiq