Soyasida mayli oʻtir,
Yaproq sendan ranjimasin.
Poklanib, soʻng qabrga kir,
Tuproq sendan ranjimasin.
Bu yoʻl nozikdir, omon boʻl,
Nafsing uchun eng yomon boʻl,
Ismoilcha yot qurbon boʻl,
Pichoq sendan ranjimasin.
Havolanma qoʻrisalar,
Toʻgʻri soʻzla soʻrasalar,
Oʻlsang kafan oʻrasalar —
Matoh sendan ranjimasin.
Oshigʻing koʻchgani mahal,
Dod desin kechganing mahal,
Suvidan ichganing mahal,
Buloq sendan ranjimasin.
Mahbubiy har mudom tik tur,
Dushmanga qarshi tetik tur,
Faqat rukuʼda egik tur,
Xalloq sendan ranjimasin.
Soyasida mayli oʻtir,
Yaproq sendan ranjimasin.
Poklanib, soʻng qabrga kir,
Tuproq sendan ranjimasin.
Mahbubiy
