Davlat xizmatini rivojlantirish agentligi Buxoro viloyati filiali

Бухорода "Хотин-қизларнинг ижтимоий ва давлат бошқарувдаги ўрни" мавзусида раҳбар аёллар форуми ташкил этилди.

Малакали бошқарув кадрларни тайёрлаш тизимини ривожлантириш, хусусан хотин-қизларнинг ижтимоий, сиёсий фаоллигини ошириш, давлат бошқарувида муҳим қарор қабул қилиш жараёнидаги иштирокини янада кенгайтириш, салоҳиятли раҳбар аёллар корпуси учун номзодларни мақсадли тайёрлаш муҳим.

Шу мақсадда Ўзбекистон Республикаси Президенти ҳузуридаги Давлат хизматини ривожлантириш агентлиги Бухоро вилояти филиали томонидан Бухоро вилояти ҳокимлиги билан ҳамкорликда "Хотин-қизларнинг ижтимоий ва давлат бошқарувдаги ўрни" мавзусида раҳбар аёллар форуми ташкил этилди. Форумни Бухоро вилояти ҳокими Ботир Комилович Зарипов кириш сўзи билан очиб берар экан мамлакатимизда ҳурматли Президентимиз ташаббуслари билан сўнгги йилларда хотин-қизларнинг ҳуқуқ ва қонуний манфаатларини ҳимоя қилиш, уларнинг иқтисодий, ижтимоий ва сиёсий фаоллигини ошириш, соғлиғини сақлаш, касбга ўқитиш ва бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлаш, гендер тенгликни таъминлаш борасида ислоҳотлар тизимли равишда олиб борилаётганлиги алоҳида тўхталиб ўтилди.

Учрашувда вилоят ҳокими ўринбосари-Оила ва хотин қизлар бошқармаси бошлиғи Ҳафиза Артикова, Олот тумани ҳокими Наргиза Нематова, шунингдек, Ўзбекистон Республикаси Олий Мажлиси Қонунчилик палатаси Коррупцияга қарши курашиш ва суд-ҳуқуқ масалалари қўмитасининг аъзоси Шахноза Жолдасова, Давлат хизматини ривожлантириш агентлиги масъул ходими Фарангиз Авазбековалар қолаверса вилоятдаги давлат органлари ва ташкилотларда фаолият юритиб келаётган раҳбар аёллар иштирок этишди.

Мулоқот давомида Давлат фуқаролик хизматида хотин-қизлар ҳуқуқларининг асосий тамойиллари, юртимизда гендер тенглиги бўйича олиб борилаётган ислоҳотлар, жамиятда хотин – қизларнинг ижтимоий сиёсий фаоллигини ошириш, давлат фуқаролик хизматида хотин-қизларни раҳбарликка мақсадли тайёрлашнинг ташкилий-ҳуқуқий жиҳатлари атрофлича муҳокама қилинди.

Форум давомида тажрибали ва салоҳиятли масъул раҳбарлар, соҳа мутахассислари раҳбар аёлларда лидерлик, халқпарварлик, креативлик кўникмаларини шакллантириш, давлат хизматида инновацион технологияларни қўллашда хотин-қизларнинг роли, давлат хизматчиларининг саломатлиги — давлат хизмати самарадорлиги кафолати, давлат хизматида оила ва карьера мувозанатини таъминлаш стратегиялари мавзуларида ўз фикр ва мулоҳазаларини билдиришди. Соҳада йиллар давомида босиб ўтилган ҳаётий тажрибаларини ўртоқлашишди.

Бухоро вилоятидаги туман ва шаҳар ҳокимлари, уларнинг ўринбосарлари билан фаолият самарадорлигини оширишда стрессни бошқариш усуллари бўйича психологик тренинглар ўтказилмоқда.
Бухоро вилоятида жорий йилнинг апрель ойи учун режалаштирилган “Инсон ресурслари ва кадрлар салоҳиятини ривожлантириш, давлат фуқаролик хизматига профессионал ва фидойи кадрларни танлаш ойлиги” доирасида Президент ҳузуридаги Давлат хизматини ривожлантириш агентлиги Бухоро вилоят филиали ташаббуси билан туман ва шаҳар ҳокимлари, уларнинг ўринбосарлари, ташкилий кадрлар гуруҳи раҳбарлари учун жорий йилнинг 24-29 апрель кунлари режа график асосида психологик тренинглар ўтказилиши режалаштирилди.
Ўтказилаётган тренинглардан асосий мақсад туман ва шаҳар ҳокимликлари раҳбар ходимларининг руҳий барқарорлигини мустаҳкамлаш, хизмат фаолияти самарадорлигини оширишдан иборат.
Тренингларни самарали ўтказиш мақсадида Бухоро давлат университетининг малакали психологлари жалб этилди. Белгиланган режа графикка асосан 24-25 апрель кунлари Бухоро, Жондор туманлари ҳамда Когон шаҳар ҳокимлари ва уларнинг ўринбосарлари учун тренинглар ўтказилди.
Ўтказилган тренинглар давомида психологик кўникмалар, жумладан, стрессга бардошлиликни ошириш, руҳий зўриқишларнинг олдини олиш, ностандарт ҳолатларда вазиятни тўғри баҳолаш ва оқилона қарор қабул қилиш, вербал ва новербал мулоқот ўрнатиш кабиларга алоҳида эътибор қаратилди. Машғулот якунлари бўйича олинган хулосаларга асосан иштирокчиларга зарур тавсиялар берилди.
Тренинглар белгиланган режа асосида вилоятнинг бошқа туман ва шаҳар ҳокимликларида давом эттирилади.

Давлат органлари ва ташкилотларининг инсон ресурсларини бошқариш бўйича фаолияти ривожлантирилади

Бухоро вилоятида Вазирлар Маҳкамасининг “Республика ва маҳаллий ижро этувчи ҳокимият органларининг инсон ресурсларини бошқариш бўйича фаолиятини самарали ташкил этиш чора-тадбирлари тўғрисида”ги қарори мазмун-моҳиятига бағишланган ўқув-семинар ташкил этилди.

Унда вилоят бошқарма ва ташкилотларнинг инсон ресурсларини ривожлантириш ва бошқариш бўлинмалари масъуллари иштирок этди.

Ўқув-семинар инсон ресурсларини бошқариш соҳасидаги янги талаб ва ёндашувларни тушунтириш, қарорнинг ижросини таъминлашда масъуллар учун аниқ вазифаларни белгилаб олиш, давлат органлари ва муассасаларида кадрлар сиёсатини самарали ташкил этишга кўмаклашиш, тизимда шаффофлик ва натижадорликни ошириш мақсадида ташкил этилди.

Ўқув-семинар давомида инсон ресурсларини бошқариш бўйича фаолиятини баҳолаш ҳамда мазкур бўлинмалар раҳбарларини аттестациядан ўтказиш тартиби тақдимот қилинди.

⚡️Давлат фуқаролик хизмати ва таълим интеграциясига йўналтирилган янги ҳамкорлик

“Инсон ресурслари ва кадрлар салоҳиятини ривожлантириш, давлат фуқаролик хизматига профессионал ва фидойи кадрларни танлаш ойлиги” доирасида Бухоро шаҳридаги Осиё халқаро университетида Президент ҳузуридаги Давлат хизматини ривожлантириш агентлиги Бухоро вилояти филиали ва университет раҳбар ҳамда масъул ходимлари иштирокида учрашув бўлиб ўтди.

Мулоқот аввалида Президент ҳузуридаги Давлат хизматини ривожлантириш агентлиги Бухоро вилояти филиал раҳбари Зафар Жумаев томонидан иштирокчиларга Агентлик фаолиятининг устувор йўналишлари, бугунги кундаги кадрлар сиёсати ва давлат фуқаролик хизматида меритократия тизимини жорий этиш бўйича амалга оширилаётган ислоҳотлар, кадрларни танлаш ва ишга қабул қилишнинг очиқ танлов тизими, vacancy.argos.uz портали имкониятлари, танловларни ўтказиш тартиби ва танлов босқичлари, давлат фуқаролик хизматчилари фаолиятини баҳолаш жараёнлари, давлат фуқаролик хизматчиларини малакасини ошириш каби фаолият йўналишлари бўйича тақдимот қилинди.

Учрашув давомида Осиё халқаро университети ректори Сухроб Дехканов томонидан таълим муассасасининг фаолияти, эришилган ютуқлар ва истиболдаги режалар тўғрисида батафсил маълумот берилди.

Маълумот ўрнида, Осиё халқаро университети 2022 йилда ўз фаолиятини бошлаган бўлиб, ҳозирда таълим муассасасида 35 та бакалавр, 14 та магистратура, 25 та ординатура, 5 та докторантура, 4 та масофавий таълим ва 3 та ҳалқаро мутахассисликлар бўйича йўналишлар мавжуд бўлиб, талабалар кундузги, сиртқи таълим билан биргаликда кечки таълим йўналишида ҳам ўқиш имкониятига эга. Бугунги кунда университетда бакалавр йўналишлари бўйича 20,7 минг нафар, магистратура йўналиши бўйича 1,1 минг нафар жами 21,8 минг нафар талабалар таҳсил олмоқда.

Шунингдек, очиқ мулоқот давомида вакант лавозимлар очиқ портали фаолиятини битирувчи ва магистратура йўналишида таҳсил олаётган талабалар ўртасида кенг тарғиб этиш, бугунги кунда кадрлардан талаб этиладиган билим ва малакавий компетенцияларни ёшларга етказиш мақсадида карьера кунларини ташкил этиш, давлат фуқаролик хизматчиларини малакасини ошириш каби йўналишларда университет билан ҳамкорликда амалга оширилиши режалаштирилган лойиҳалар кенг муҳокама қилинди.

Учрашув якунида Президент ҳузуридаги Давлат хизматини ривожлантириш агентлиги Бухоро вилоят филиали ва Осиё халқаро университети ўртасида ҳамкорлик тўғрисида меморандум имзоланиб, меморандумда белгиланган вазифаларни амалга ошириш бўйича чора-тадбирлар режаси тасдиқланди.