Chamamda o'zgargan ishqiy suhbatlar,
Unutildimikin azaliy hayo?
"Xat yozsa, barmog'i hayajonlangan
Go'zal oshiqlarni yo'qotdi dunyo"

Avvalgidek emas sevuvchi qalblar,
Tafti aylolmaydi yurakni kabob.
Jondan bo'lak har ne topilar, ammo-
Uyatdan qizargan nigohlar kamyob...

Taqvolisin izlar, solihin kutar,
Tahajjudni bir bor yo'qlamaganlar.
O'zlarini ma'shuq atashar, essiz,
"Farhod va Shirin" ni o'qimaganlar!

Zinhor uchmagaymiz yengil gaplarga,
Mayli, duolarda yashaylik omon.
Ko'zlari to'qnashsa, yoshlanadigan
Chin oshiqlaringni asragin, Rahmon...

#Visola Tursunova

@alamiy_uz