YEJI KOSHINSKIY
«RANGIN QUSHCHA»

Yer yuzidagilardan panoh topolmagan bolakay Xudoga yolvora boshlaydi. Yillar davomida qilgan duolari azoblarini yengillatmaganidan so‘ng bu dunyoda Iblis hukmronligiga ishonadi va unga topina boshlaydi. Shundan so‘ng hayoti biroz bo‘lsa-da osonlashadi. Bo‘rilar orasida bo‘ri bo‘lsangizgina yashab keta olasiz. Yer yuzida farishta bo‘lolmaysiz, chunki bu yer jannat emas.
Shunchaki qancha yomon bo‘lsang, shuncha kuchli bo‘lib boraverasan. Qancha kuchli bo‘lsang, shuncha ko‘p yomonlik qilishing mumkin.
Qahramonning e’tiqodiy masaladagi tahlillari Dostoyevskiyning «Aka-uka Karamazovlar»ini yodga solib yubordi. Unda ham aynan bolalar azoblanayotgani bois Yaratganga isyon qilinadi. Murg‘ak go‘daklarning hech qanday gunohi yo‘q, ular hali gunoh qilib ulgurmay do‘zax azobini tortishiga, o‘lib ketishiga sabab nima? Bularning bari odamning aqli yetmaydigan qandaydir ilohiy adolat ustiga qurilgan, gunoh-savoblarni o‘lchash, jannat-do‘zax ahlini saralash uchun qilinayotgan bo‘lsa-da, bu jarayonda begunoh bolalardan xomashyo sifatida foydalanishga Xudoning haqqi yo‘q edi, degan fikrni ilgari suradi Dostoyevskiy va Koshinskiy.