ДУНЁ

Камбағалнинг қайнат қозонин,
Ўртаҳолга берақол улов.
Дунё, дунё, бўйдоқ ҳолидан
Бир кунгина ҳол сўрсин биров.

Ҳажга бормоқ истар онахон...
Ўзинг бергил унга тасалли --
Каъба ичра мунглуғ қалбини
Боғлаб юбор ишқ риштаси-ла!

Кўзларида попукдек назар,
Қошларида баҳорий сурма –
Тўй кунида куйган қизларга
Куёвларни улашгин чирмаб!

Кўтарилсин миллатдан мискин,
Ғарибларнинг оҳию ғами.
Болаларнинг оғизларида
Тугамасин музқаймоқ таъми.

Аммо бир зот сўраса сендан
Молу давлат, боқмагил қиё –
Яхши шеърлар ёзиши учун
Шоирингни аяма, дунё!

@Xayrulla_Hamidov_adabiyot