​​​​УЙҒОНИНГ

Янги куннинг авжи уйғонди,
Оймомонинг завжи уйғонди,
Дарёларнинг мавжи уйғонди,
Сиз ҳалиям ухлаяпсизми!?

Аллақачон кўзин очди тонг,
Бугун учун чалаётир бонг,
Зулмат ичра ғафлат босиб, донг
Сиз ҳалиям ухлаяпсизми!?

Уйғонганлар қалби чақиндир,
Кўнгиллари ёруғ - ёрқиндир,
Туринг, вақти-бомдод яқиндир,
Эҳ, ҳалиям ухлаяпсизми!?

Умр асли ўткинчи, ғорат,
Вақт саналмас мудроқи ҳолат,
Дам ғанимат, лаҳза омонат,
Сиз ҳалиям ухлаяпсизми!?

Қаранг, омад қўлин тутмоқда,
Фаришталар бир-бир ўтмоқда,
Сизни буюк ишлар кутмоқда,
Эҳ, ҳалиям ухлаяпсизми!?

Уйқу - басир умрдир гуё,
Унда неки, ҳаммаси рўё,
Уйғонди юрт, уйғонди дунё,
Сиз ҳалиям ухлаяпсизми!?

Янги йилнинг илк тонгини қарши олишга уйғонганларга Ассалому-алайкум!
Тонгингиз муборак бўлсин!

Эҳтиром ила: Ўлмасбек Самарқандий.

@Samarqandiy77