Bir kuni behosdan koʻrishib qolsak,
Yana nigohingiz etsa chalajon.
Hamon men yoqtirgan rangdagi koʻylak,
Oʻsha men tanlagan atirmi hamon?

Bir kuni behosdan koʻrishib qolsak,
Ismim labingizdan ketsa toʻkilib.
Yana dunyosiga kelsam qaytadan,
Koʻzim muhridagi yuzga tikilib...

Bir kuni behosdan koʻrishib qolsak,
Yurakdan yurakka oʻt ketsa oʻtib.
Xato qilganimiz tan ololmasak,
Qachondir siz mendan, men sizdan ketib!

Bir kuni behosdan koʻrishib qolsak,
Yana hammasiga qismat aybdor.
Sizda armon toʻla bahaybat yurak,
Mening ushalmagan orzularim bor.

Bir kuni behosdan koʻrishib qolsak,
Kulib salomlashsak...
Xayrlashsak jim.
Sogʻindim deyishga sizda yoʻq jurat,
Sevaman deyishga sigʻmasa haddim!

Bir kuni behosdan koʻrishib qolsak,
Yopiq qolaversa hasrat daftari.
Soʻng ketsak, siz sizni kutmaslar tomon,
Men esa alamli armonlar sari.

©️Malika Salimova