НАСИҲАТ

Эшитдик, зўр экан, ҳикоятингни,
Аммо бир гапим бор, қаттиқроқ олма –
Аллоҳга айт ана шикоятингни,
Ҳадеб қисматингни ўртага солма!

Ақл-ла безамиш Холиқ инсонни,
Сен-да башарийлик ҳолидан қолма:
Ўзинг танлагансан бу имтиҳонни,
Ҳадеб узлатингни ўртага солма!

Шайтон юрар мудом феълингни пойлаб,
Майли, сен қочмоқдан ҳеч лаҳза толма,
Валийлар сукутин дилингга жойлаб,
Вале хислатингни ўртага солма!

Ҳар банда бўйнида савобу хато,
Ғариблик рутбангдан асло уёлма –
Аллоҳ учун қилган бўлсанг мабодо,
Ҳадеб хизматингни ўртага солма!

2014 йил

@xayrulla_hamidov_adabiyot