БАЪЗАН

Дунё, садоқатинг бордир, шекилли –
Устун қўйиб гоҳо ўтлуғ матлабни,
Нурли ўтмиш томон боқсак тикилиб,
Волий қолиб ҳамма эслар Машрабни.

Дунё, адолатинг бордир гоҳида –
Хотиранг ненидир янгилар экан:
Адоғи йўқ суҳбат топишмоғида
Баъзан аҳмоқлар ҳам енгилар экан.

Дунё, муҳаббатинг тирикдир, ажаб,
Энг йиртқич йўлбарс ҳам боқар мулойим.
Севги тириклиги, борлиги сабаб
Панада ётибди қиёмат қоим.

@Xayrulla_Hamidov_adabiyot