Ming jafolar bersang shikoyat etmay,
Vafo lazzatidan tot olay Do‘stim!
Visol manzilini ko‘rsat men ko‘ray,
Shaylanib, kuch yig‘ib ot solay Do‘stim!

Ishqdan boshqa yo‘lga hayhot yurmadim,
Charchasam sudraldim, to‘xtab turmadim,
Sendan ayrilgach rost-zinhor kulmadim,
Mungli, ham sharafli dod solay Do‘stim!

Mahbubiy sevgisi boshqa, dermishlar,
Vafodor isyonkor ishqqa, dermishlar.
Istarsam dunyoning molin bermishlar,
Sensiz dunyo molin na qilay Do‘stim?!

«Hu!» deya xalqaga chaqirganim bor,
Haqqa to‘g‘ri yurgan yo‘limdir, yo‘lim.
Zokirlar bog‘ida har fasl bahor,
Qalbimda ochilgan gulimdir, gulim.

Mahbubiy muhabbat jumlasin yozgan,
Ishqini oshiqning holidan sezgan,
Bir qiyo boqsin, deb bir umr kezgan,
Hijronda yara qalb - tilimdir, tilim.

Achinma  oshiqning barbod holiga -
Yig‘lama, qolmaysan hech uvoliga,
Qancha mayl etsang ham dunyo moliga,
Oxirgi nasibang o‘limdir, o‘lim!


©Mahbubiy