Sitora Abduxoliqovna | Blog

🗣Oiladagi kun ora bo‘ladigan baqir chaqirlar to‘rt yashar bechora bolaning yuragini olib qo‘ygandi. Otasini "onangni" deb so‘kishlari-yu, onasini esa gapdan qaytmay og‘zidan adi kirib, badi chiqishlari har kuni takrorlanardi. Bugun ham kosa piyolalar uchdi.

↪️Qo‘ling singur alkash! Birimni ikki qilganday nega kosalarni sindirasan?! Menga kuching yetmagach jonsiz narsalardan alamingni olayapsanmi?! – dedi ayol shang‘illagancha.
➡️Bir joying ko‘karsayu melisaga chopsangda a haromi?!
↪️O‘zing haromi!
➡️O‘chir ovozingni!
↪️Tilim qisiq joyi yo‘q sendan! O‘zing o‘chir ovozingni!

😢 Burchakda yig‘lab qaltirab turgan bolakay sekin shivirladi. Urishmayla... Ammo bechora bolakayning dildan chiqqan nolasi ota-onasining odobsiz so‘kishlari qariga eshitilar eshitilmas g‘oyib bo‘ldi. Ular farzandiga e’tibor bermay yana janjallasha boshlashdi.

♦️Bolakay sekin o‘rnidan turib hovliga chiqdi. Qishning izg‘irini bolakayning tanasini junjiktirdi. Choponchasini kiyib chiqishga yuragi betlamadi. Sovuq bo‘lsa ham u uchun hovli tinch edi. Bolakay sovuq qotdi. Ayvondagi etikchasini kiydi-yu, qo‘yxona tomonga yo‘l oldi. Qishning oxirlarida qo‘ylar tug‘ishni boshlaydi. Kechasi qo‘ylar tug‘sa sovuqqa qolmaslik uchun otasi qo‘yxona yoniga tomcha qurgandi. Qo‘zilarni quritib isitish uchun pechka ham qurilgandi o‘sha tomchada. Bolakay o‘sha tomchaga kirdi . U yer ham ota-onasining so‘zlari kabi sovuq edi.

♦️Bolakay jajji qo‘lchalari bilan pechka yonidagi o‘tinlarni pechga qaladi. Qog‘oz topib o‘tinlar orasiga tiqib gugurt chaqdi. Ammo qog‘oz yonib tamom bo‘ldi, o‘tin esa yonmadi. Pechkani yonida bakalashkada turgan suyuqlikni otasi o‘tinga sepib yoqardi. Bola ham shundoq qilmoqchi bo‘ldi. Plastik idishdagi salyarka emas gazbalondan to‘kilgan gaz suyuqligi ekanligini qayerdan bilsin bechora bola? Olov tez yonishini istagan sovuq qotgan bechora bolakay o‘tin ustiga ko‘proq sepib plastik idishni og‘zini yopmasdan pech yoniga qo‘yib gugurt chaqdi ...

Er-xotinning ko‘zi deraza tomondan yonayotgan tomchaga tushdi. O‘sha tomonga yugurishdi. Qo‘shnilar ham kelishib olovni o‘chirishdi . Ichkariga kirishdi. Bechora bola kuygancha yerda yotardi. Ota jon holatda qichqirib bolasini qo‘liga oldi. Bolakayning kuygan terisi otasining qo‘llariga yopishdi. Bolakay so‘ngi bor shivirladi: Urishmayla...

©️Turg‘unjon Ochilov

✈️ Oddiy odamlar | Ibratli dunyo