Davosi sen bo‘lgan dardlar bor menda
Shunday og‘riganman, shunday og‘ridim.
Avvallar men seni bilmagan damda
Soydek sokin edim, baxtiyor edim.

Davosi sen bo‘lgan dardlar bor menda
Jon-jonimdan o‘tdi bilsang zahmati.
Yana arzonlashar ko‘ngilginamning
Sen sariq chaqaga olmas qiymati.

Davosi sen bo‘lgan dardlar bor menda
Bir so‘zing daf qilar hijronlar aro.
Aslida sog‘insa dard berar Tangrim,
Suyganin sinovga tashlaydi Xudo.

Davosi sen bo‘lgan dardlar bor menda
Tabibim kela qol, tomirimni tut.
Ajabmas, birgina nigohing bilan
Barcha sitamlarim bo‘lsalar unut.

Davosi sen bo‘lgan dardlar bor menda...