Forish tumani Andagin qishlog‘ida davlat muhofazasiga olingan mo‘tabar qadamjolardan biri “Hazrati Eshon xalifa” ziyoratgohidir.  “Hazrati Eshon xalifa” ziyoratgohi Jizzax shahridan 120 km, tuman markazi - Bog‘don shaharchasidan 45 km shimoli-g‘arbdagi uzoqlikda joylashgan. Qishloq atrofidagi tabiiy landshaft deyarli o‘zgarmagan, tabiati nihoyatda go‘zal, baland tog‘lar, sersuv buloqlar ko'p.

“Hazrati Eshon xalifa” ziyoratgohi Andagin qishlog‘ining o‘rta qismida 
joylashgan. Bu manzilni so‘ngi makon tutib, avliyolik maqomiga erishgan aziz 
zotning ismlari Jaloliddin ibn Abdukarim bo‘lgan. Piri komil e’tiqodi bilan o‘zgalarga namuna bo‘lgan, butun hayotini ilm, ma’rifat va donishmandlikka bag‘ishlagan. Aziz zotning hujralarida eski buyra, kitoblar taxlangan taxta va  yostiqdan boshqa narsa bo‘lmagan.
Ziyoratgohni hozirgi hududi salkam 0,5 gektarni tashkil etadi. Mazkur madaniy meros ob’ekti hozirda qayta qurilmoqda. Ziyoratgoh hovlisida ajoyib buloq va kichik hovuz bor. Buloq suvi shifobaxsh xususiyatga ega bo‘lib, undan doimo toza zilol suv oqib turadi. Hovuzda relikt hisoblangan gulmohi baliqlari ko‘p.

So‘nggi yillarda muqaddas qadamjo atrofi yanada obodonlashtirib turildi 
va turli xil archa daraxtlari hamda gullar o‘tqazildi. Ziyoratgoh hovlisida bir nechta qadimiy tut va yong‘oq daraxtlari bor. Keksa daraxtlarning yoshi taxminan 250-300 yilni tashkil qiladi.