РАМАЗОН

Сен келсанг, қувончдан яйрайди диллар,
Келишинг роҳат-у кетишинг азоб.
Хатми Қуръонлардан толиқмас тиллар,
Ўттиз кун ёзилмиш мукаммал савоб.

Сен келсанг, занжирбанд этилмиш шайтон,
Жинларнинг йўлига қўйилмиш тузоқ.
Фазилат, саховат, мурувват, иймон
Қайнайди мўминлар қалбида булоқ.

Сен келсанг, очилмиш жаннат эшиги,
Жаҳаннам эшиги ёпилмиш буткул.
Таърифинг беқиёс, ирфон бешиги,
Эъзозлаб пойингга сочмоқ керак гул.

Сен келсанг, самодан ёғилмиш раҳмат,
Ҳатто малаклар ҳам тилар кушойиш.
Саҳарлик онларинг бунчалар роҳат,
Ҳижронга йўқ бизда ҳеч қандай хоҳиш.

Сен кетсанг, анвойи гуллар очилмас,
Маюс бўлиб қолар таратмай ифор.
Ифторлик онлари шукуҳ сочилмас,
Қоплагандек шаффоф фазони ғубор.

Сен кетсанг, кўнглимиз қолар ҳувиллаб,
Сувга ташна бўлган гиёҳлар мисол.
Руҳан сен бизларга мағфират тилаб,
Тарк этмай абадий қалбимизда қол!

Эркин ҚУДРАТУЛЛОҲ

♻️Дўстларингизга ҳам улашинг!!! https://t.me/XojagonUz