Birgina soʻz joʻnat,
Bir dona soʻz yoz,
"Salom"mi,
"Qalaysan",
"Tinchmi" deb qoʻygin.
Yo bitta nuqtani qoʻygin joʻnatib.
Sendan kelsa oʻsha tinish belgisi,
Qalbimga umidni qoʻyar oʻrnatib.
Birgina soʻz bilan hayotga qaytar,
Sunʼiy nafas bergin bitta soʻz ila.
Men esa tunlari to tongga qadar,
Xudoga yolvoray umringni tilab.
Koʻnglingni ber menga,
Koʻnglingni faqat,
Osmonni, bahorni, gullarni emas.
Sensizlik jabriga griftor etib,
Umidim soʻngiga eltib qoʻyma, bas!
Yomgʻirni sevaman, tongni, shafaqni,
Quyoshni oʻynayman yoqib-oʻchirib.
Oʻsha hammasidan judo boʻlsam ham,
Oʻzingni oʻzimdan ketma koʻchirib!
Jimliklar jariga joylama jonim,
Habar joʻnatib qoʻy undov toʻldirib.
Yonimda yoʻgʻinga koʻnarman, ammo,
Yodingda yoʻqligim qoʻyar oʻldirib