Xalqaro turizm maskanlaridan biriga aylanishi kutilayotgan ushbu majmua jahonga mashhur “Zaha Hadid architects” kompaniyasi tomonidan loyihalashtirilgan. “Zaha Hadid architects” dunyodagi eng nufuzli arxitektura firmalaridan biri sanaladi. U jahon arxitekturasida o‘ziga  xos yondashuvga ega innovatsion me’mor Zaha Hadid nomi bilan ataladi

Alisher Navoiy nomidagi xalqaro ilmiy-tadqiqot markazi shahar aholisi va mehmonlariga haftada yetti kun, yigirma to‘rt soat davomida yashash, o‘qish va hordiq chiqarish maskani bo‘lishi nazarda tutilmoqda.

Mamlakatimizda “Zaha Hadid Architects” tomonidan amalga oshirilayotgan navbatdagi durdona loyiha – Alisher Navoiy nomidagi xalqaro ilmiy-tadqiqot markazi ham an’anaviy o‘zbek naqshlari va zamonaviy dizayn tamoyillari bilan boyitilgan monumental arxitektura namunasi bo‘lishi ko‘zda tutilmoqda. Ushbu loyiha doirasida ixtisoslashgan maktabning o‘quv binosi, yotoqxona, ilmiy tadqiqot markazi, Alisher Navoiy nomidagi muzey, xalqaro anjumanlar saroyi va konferensiyalar kompleks binolari bo‘lishi rejalashtirilgan.

Bu yerda piyodalar bog‘da sayr qilib, sharqdan g‘arbgacha bo‘lgan masofani yayov kezishlari va go‘zal tabiat manzarasi hamda toza havodan bahra olishlari mumkin. Ushbu markaz madaniy tadbirlar, musiqiy chiqishlar uchun ham ajoyib maskan bo‘lishi kutilmoqda. Yuksak me’moriy yechim va yondashuv bilan barpo etilayotgan ob’ekt yil davomida qulay ichki iqlimni yaratib, mamlakatimiz me’morchiligida muhim ob’ekt sifatida o‘rin oladi.
© Sh.Mamaturopova, OʻzA