ЭРКАКЛАР КУНИ
Дейдилар март ойин саккизинчиси
Аёллар байрами, аёллар куни.
Борми бу оламда эркакка ҳам кун?
Ёки ёришмасми эркакнинг туни?
Эсини танибоқ югурар ишга,
Мурғак юрак билан ер оила ғамин.
Пул топди дегунча чопади уйга,
Тўлдирай дейди-да рўзғорнинг камин.
Мўйлаби сабз урмай туради ғоздек,
Хўроздек асрайди маҳрамларини,
Опаси - номуси, сингил - ғурури,
Қизғанар онасин рўмолларини.
Жуфт берса, ишонмай замину кўкка,
Асраб-авайлайди қорачиғидек,
Югирар ош-нону уй-жой кўйида,
Уйига ташийди чумолилардек.
Қора қозонини қайнатайин деб,
Кезади ажаму араб юртини,
Фарзандим ҳеч кимдан кам бўлмасин деб,
Фидолар қилади бор вужудини.
Бир айби бор – адл, ишонар, содда,
Макру ҳийла билмас, момиқ ҳам эмас,
Лекин унинг ўнги доим ичида,
Дилдаги ҳар сўзин изҳор этолмас.
Унинг меҳрин истанг хизматларидан,
Ёлғонни эп кўрмас ҳаргиз ўзига.
Муҳаббатин топинг мушфиқ қаддидан,
Фидодир минг жони айтган сўзига.
Халқига борини сочганлар улар,
Ватанга кўксни қилдилар қалқон,
Пешона теридан қуриб дунёни,
Кашфу ихтиро ҳам улардан аён.
Улардан чиққандир пайғамбарлар ҳам,
Подшоҳлик доим улар қўлида.
Мужтаҳид олимлар уларга хосдир,
Толмаслар илм-фан, равнақ йўлида.
Улар ҳам иззату ҳурматга лойиқ,
Улар ҳам меҳр ва эътибор истайди.
Уч юз олтмиш тўрт кун ишлади, ахир,
Эркакка ҳам бир кун берса арзийди.
Бу сўзлар барчаси самимий, адл,
Эркакни мақтасам, келмасин малол,
Ҳар қанча бўлса ҳам шону шавкати,
Эркакни дунёга келтиргай аёл.
Қарасам, ҳамма аёлларни мақтаб, таърифлаб шеър ёзаркан, бир эркакларни ҳам таърифлай дедимда...
Ҳасанхон Яҳё Абдулмажид
03.03.2023
Hasanxon Yahyo Abdulmajidning rasmiy sahifalari👇
Telegram |
Facebook |
Youtube |
Instagram
