Birinchi
ikkinchi,
uchinchi,
yigirma to'qqizinchi...
yoshdan yoshga ko'chib,
qafasdan qafasga
uchib,
yashayapmiz.
Nima deysan, dunyo?
Tug'ildik ayollik gunohi bilan
bir umr tilimiz, yelkamiz qisiq.
Bizdayam huquq bor qaydadir, bilmam,
Men uchun Xudoning mantig'i qiziq.
katta qiz bo'lamiz anglab-anglamay,
Katta orzularga boʻlamiz yukli.
Eng ko'p og'ritganga eng ko'p oshiqmiz,
Iztirob degani buncha suyukli.
Embrion muhabbat, embrion umid
bolaga aylanmay bo'ladi nobud.
Qayerda xotirjam, sokin muhit bor,
Buncha liqqillaydi biz tushgan tobut?
Do'zaxmi, jannatmi qolmadi farqi,
Sira bo'g'zimizda tinmadi faryod.
Kemtikmi, to'kismi-o'zgarmas dunyo,
Baxtlimi, baxtsizmi - baribir ayol...

©️MehrNoz