Onamning surati

Onamning suratin olib qo'limga,
Xayolan so'zlashib ko'ngil so'rayman.
U mushtoq bo'lganday mening yo'limga,
Shunchalar termulib unga qarayman.

- Nechun suratimni qo'lingga olding?
- Onajon, sizni bir ko'rgim keldi-da...
- O'g'lim, nega buncha termulib qolding?
- Shunchaki, sizdan hol so'rgim keldi-da.
- Boshginang g'amlardan omonmi, jonim?
- Siz borsiz, tashvishlar menga begona.
- Ilohim baxtingni bersin xudoyim.
- Siz mening borlig'im, baxtimsiz ona!
Bugun bitta dardga yetmadi kuchim...
- Qay dard-ki solibdi ko'nglingga qayg'u?
- Ona, rasmingizni kelyapti quchgim.
- Seni qiynayotgan u qanday tuyg'u?
U qanday dard ekan, ojiz bardoshing?
- O'ylamang, na xorman va na og'rindim.
- Xo'sh nechun bag'rimni ezar ko'z yoshing?
- Onajon, shunchaki... sizni sog'indim!

@D_Renessans