Ҳ А З О Р Н У Р

"Ҳазорнур"га нур этганлар,
Йўли нурга тўлгайдир.
"Ҳазорнур"га йўл этганлар,
Умри нурга тўлгайдир.
*


...Саҳро бағрин ёритади,
Минг шаҳиднинг иймони.
"Ҳазорнур" --бу Ислом учун
Жон берганлар қўрғони!

Огоҳ бўлиб қадам босгил,
Бу тепада минг қабр.
Минг мусулмон, минг баҳодир,
Минг қабрда минг сабр.

Бунда ётар дин йўлида,
Фидо мингта паҳлавон.
Бошингни эг, бу тупроқда,
Тўкилган минг қутлуғ қон...

Молики Аждар бош саркарда,
У исломнинг қалқони.
Аллоҳ, Аллоҳ дея бир дам,
Тинчимаган забони.

"Ҳазорнур" -бу нурли қўрғон,
Шаҳидларнинг мозори.
Ким зиёрат айласа гар,
Нурга чўмилгай бори.

Ойдек ёғду таралади,
Ҳар бир қабр тошидан.
Келган инсон тиёлмагай,
Кўзини кўз ёшидан.

Кофирларни зир қақшатган,
Мардлар ётар, руҳи--нур
Таҳоратда бўлиб киринг,
Бу жой номи--"Ҳазорнур"

Бунда ният айласангиз,
Ижобат бўлгай илло.
Зиёратга келганларни,
Ўзи қўллагай Худо.

..."Ҳазорнур"ни обод этган,
Муродига етгайдир.
Парвардигор икки дунё,
Саодатин битгайдир.

Қабрингизга чироқ бўлар,
Охират- куни ҳузур.
Қиёматда Сизга қалқон,
Мингта шаҳид--"Ҳазорнур"!

БОБОҚУЛ УСМОН