Нодир АФОҚОВА
ИЧИМ ТАШҚАРИГА ЧИҚМОҚДА ҲАЙҲОТ

Қўлим қалтирайди.
Кўзим жомидан
Тўкилар аччиқ май. Тўкилар ҳаёт.
Бу қандай...
бу қандай...
Бу қандай?
Ичим ташқарига чиқмоқда, ҳайҳот.
Кошки Сен-ла бир халқ бўлмасак эдик.
Кўзимнинг олдига келмасанг кошки.
Сендан сўрамасам: “Нимага ярадик
Кулфатларга аза очишдан бошқа?”
Буюк эврилишлар лаҳзада содир:
Бу Кузмидир ёки Кўзими ғамнинг?
Бу қандай
бу қандай... шеър ўқиётиб
Қўли қалтираса одамнинг?