Siz hali kelasiz boshingiz egib,
Bilaman osonmas tushmoq osmondan.
Kelasiz, alamlar koʻngilga tegib,
Sogʻinchlar juda ham  oʻtganda jondan.

Kelasiz, gʻururning zanjirin uzib,
Borey, deysiz bir kun bari-bariga.
Qismatning eng qatʼiy qarorin buzib,
Qulogʻingiz tutib yurak  zoriga!

Siz hali kelasiz, ishonchim komil,
Beor demaymizku qaytsa bahorni.
Koʻnglini qoldirib ketgan yeriga,
Aylanib-aylanib qaytmagan bormi?

Siz hali kelasiz,
Xudo hohlasa,
Tez yongan olovning oʻchmogʻi ham tez.
Ichingiz unsiz bir nidoga toʻlib,
Oʻtli qarashlarim koʻzdan oʻtgan kez!

Siz hali kelasiz,
Mana keldim deb,
Uzrni soʻz emas, koʻzlar aytadi.
Minglab masofadan, ming azob bilan,
Turnalar har yili yurtga qaytadi!

Siz hali kelasiz!
Ishonchim komil!

Malika Tavfiq