Toki obunachilaring bilan fikring bir joydan chiqar ekan, yaxshi bloggersan.
Ammo oradagi iliq munosabatlar kuzatuvchilaringning qitiq patiga tegib qo'yishi mumkin bo'lgan post yozgan kuning nihoyasiga yetadi.
Yaxshi postlar joylab boryapsan. Obunachilar kelyapti. Seni blogger sifatida tan olishyapti. Senga ergashishyapti.
Bir kuni ertalab uyg'onib, "hali o'z istaklarim haqida, ichki dunyom haqida blogimda bo'lishmabman" deb o'ylab post yozgan kuning, heyt yomg'iri ostida qolasan.
Kechagina "sizning blogingizni sevaman, odamlarning ichidagini topasiz, ta'sirlantirasiz, eng zo'r bloggerlardan birisiz", deganlar ertasiga "sizdan bunday post kutmagandim, hurmatni oyoqosti qildingiz, qo'lingizdan keladigan ishni qiling" pozitsiyasiga o'tib oladi.
Ommaning muhabbati sarobga o'xshaydi.
Uzoqdan ko'zingga chiroyli ko'ringani sabab, e'tirof qilishlari uchun harakat qilasan. Ammo ularga yaqin borib, eng botiniy istaklaringni baham ko'rishing bilan cheksiz mehrlari bir soniyada barham topadi.
Fikrlaring yopmayaptimi, shunchaki blogni tark etish variantini chetlab o'tib, tahqirlab, kamiga haqoratlab ketishadi. Bu bloggerning vijdonini qiynashning bir usulimi? Yozgan posti sizga yoqmagani uchun afsuslanib, kechirim so'rasinmi?
Aslida doim sizning ko'nglingizga o'tiradigan mavzularda ijod qilish majburiyatini bo'yniga olmagan-ku.
Umuman olganda, obunachilarning muhabbati doimiy bo'lmaydi. O'zimdan misol keltirsam, 1yil oldin sevib kuzatib kelgan bloggerim bugungi kunga kelib yoqmay qolishi mumkin. Sababi, undan yetarlicha manfaat olib bo'lganman. 1yil oldingi men va hozirgi men orasida ancha farq bor. Didim o'zgardi. Endi menga yangi yo'nalish, yangi manfaatlar muhim. Bunday paytda o'tmishda sevimli bo'lgan blogdan shunchaki chiqib ketaman.
Internet foydalanuvchilaridan shuni iltimos qilgan bo'lardim-ki, hozirda siz sevib kuzatib yurgan bloggeringiz kun kelib sizning didingizga, ma'naviyatingizga xos bo'lmagan yo'nalishda o'zini sinab ko'rsa, qattiq judge qilmasdan, vijdonini qiynab "kutganimdek bo'lib chiqmadingiz, hafsalamni pir qildingiz, odamlarga birorta foydangiz tegmayapti" kabi manipulatsion gaplarni qo'llab, birovning ko'nglini og'ritmasdan, blogni go'zal tark etishni biling. Ma'lum vaqt davomida sevimli bloggeringizdan olgan ozmi-ko'pmi manfaatingizni esga olgan holda, ko'ngilga qattiq tegadigan so'zlarni qo'llash fikridan qayting.
Kerak bo'lsa, blogni qo'lingizga berib qo'yishganida risoladagidek eplolmasligingiz mumkin. Blogni yuritishni bloggerning o'ziga qo'yib bering. Vaqti kelib, blogdan manfaat olmay qo'ysangiz, hurmatingizni saqlagan holda chiqib ketish odobini o'rganing.
@mia_gapiradi
