*БИЗДИН АЙЫЛ СЕНИ КҮТӨТ*!

Жамалыңдан жылдыз учат, ай жылат,
Жылмайышың акыл-эстен тайдырат.
Назданасың жакын жуутпай эч кимди,
Сага жетпей нечен жигит кайгырат!

Күн шооласын сага чачып койгондой,
Кыялданам кээ күндөрү ой толгой.
Узун түндө көрсөм сени түшүмдө,
Уктай бергим келе берет ойгонбой!

Аруу дилиң мөлтүр таза булактай,
Абалымды сезсең боло суратпай.
Коңгуроодой жанга жагым дабышың,
Караңгыда жарык берген чырактай.

Барасыңбы кайтарбастан демимди?
Бапыратып сүйүнтөйүн элимди.
Белестеги жоогазындай кулпурган,
Биздин айыл күтөт сендей келинди!

*МАЛИК НАЗАРМАТОВ*!!!