АКА

Боқсам..
Юзингизда ҳорғинлик,ажин,
Турмуш деб, бир лаҳза олмадингиз тин.
«Инсон Ватансиз ҳам яшаши мумкин»
Ака..қай юртларда қаридингиз сиз?

Манов..
Қошингиз устида йўлми,чизиқми,
Мусофирлик нима, тамға,ёрлиқми?
Билмаймиз ҳолингиз,айтинг тузукми,
Ака..қай юртларда қаридингиз сиз?

«Баҳор уйим битар,қайтгум» дедингиз,
Болангиз ош еди,ҳасрат едингиз.
Кетарда бир норғул йигит эдингиз,
Ака..қай юртларда қаридингиз сиз?

Тинимсиз сўради отам кетар чоғ,
Тобут тутмадим деб дилингизда доғ,
Онамнинг сочидан сочингиз оппоғ
Ака..қай юртларда қаридингиз сиз?

Қурган ҳовлингизда яшаб,яшамай,
Ватаннинг корига яраб,ярамай.
Гоҳ тўй,байрамларда яйраб,яйрамай,
Ака..қай юртларда қаридингиз сиз?

Машаққат чекдингиз топай деб нонни,
Ҳаёт дарсин ўтди қип имтиҳонни.
Ким берар мусофир деган дипломни,
Ака..қай юртларда қаридингиз сиз?

Ёшлик ўтиб кетди вафо қилмасдан,
Яшадингиз юртга келиб,келмасдан.
Умр ўтганини билиб,билмасдан,
Ака..қай юртларда қаридингиз сиз?

Гоҳи тўқ,гоҳи оч кунларни кўриб,
Гоҳ қалин,гоҳ юпин тунларда юриб.
Ўзга Ватанларда шаҳарлар қуриб,
Ака..қай юртларда қаридингиз сиз?

САВРИЯ ТОҲИРОВА