BUGUNNING OʻYLARI...

Vaqt oʻtib bormoqda, aylanmoqda yer,
Yomgʻir ezib yogʻar, kimdandir ranjib.
Koʻksim makon etib yovvoyi bir sher,
Yashar rahm qilmay yuragim gʻajib.

Jim koʻnikmoqdaman, dimiqqan nafas,
Bir nima tomogʻim boʻgʻar, bilmayman.
Endi sensizlikka chidab bersam bas,
Undan ortigʻini talab qilmayman.

Sen ketgan yoʻl ana, turar beoʻxshov,
Sensiz oʻchgan goʻyo bu makon rangi.
Meni tilka pora qilar beayov,
Har kun gʻurur bilan sogʻinchlar jangi.

Yutding, olib ketding, baxtimni yulib,
Senla kurashmoqqa yetmaydi doshim.
Yomgʻirli kun edi, qolgandim kulib,
Shundan soʻng yer oʻpdi qancha koʻz yoshim...

Butkulga yopaman koʻnglim darchasin,
Tushlarda ham kelma, tinchim ayniydi.
Sen bor oʻtmishimning barcha barchasin,
Bugun yomgʻir yuvib ketsa qaniydi.

✍ Odilbek Qodirov

❤️ 𝗞𝗮𝗻𝗮𝗹 | 𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟