Тилеўберген ЖУМАМУРАТОВ

ҚАРАҚАЛПАҚ БОЛҒАЛЫ

Тараған булттай ҳәр жаққа,
Көшиўден әрман қалмады...
* * *
Әййемги қарақалпақтан,
Сақланып қалған урпақпан.

Қарақалпақ болғалы,
Ел атағын алғалы,
Не көрмеген қарекең—
Деген мақал бар екен.
Түркистанның елинде,
Туранның байтақ жеринде,
Қырық рет жасап,
қырық көшкен,
Қырық рет жанып,
Қырық өшкен.
Ҳәлсиреп, гейде жанланып,
Айбалтасын қолға алып,
Намыс ушын тирескен,
Өмир ушын гүрескен.
Жел ушырған қаңбақтай,
Гей-гейде мәкан, нан таппай,
Жазықлыдай қудайға,
Тентене болмақ оңай ма?!
Толғанып көшкен Дунайға,
Балқанның бийик, ойларын,
Едил, Жайық бойларын.
Кавказдың Шығыс арқасын,
(Шымқылдатып арбасын),
Сыйынып баба, әрўаққа,
Тараған булттай ҳәр жаққа.
Көшиўден әрман қалмады,
Белде дәрман қалмады,
Өткермей тыныш бир қысты,
Өмир ушын қырқысты.
Еллерден елге аўысып,
Көпшилигин таўысып,
Тынышлық көрмей жәҳәнде,
Қуўысқан ата мәканға.
Қутылып қырғын қамалдан,
Мәканын таўып дем алған,
Әййемги қарақалпақтан,
Сақланып қалған урпақпан.

Әдебий информация:
💎@Merwert_uz