Uyimga ketyapman deb o‘ylab
Boshqa ko‘chaga
kirib qolibman
Keyin qaytib chiqdim,
Ko‘changdan.

***

Uylarga
begonalar kirishi
mumkin emas, deb yozilsa
Ko‘pchilik kirmasdi
O‘z uyiga.

***

Men qachondir
sen haqingda yozishni
bas qilaman.
Keyin
yozishni to‘xtatsam kerak.

***

Yaxshilab o‘ylab ko‘rganimizda
hammasi
yaxshi bo‘lardi
va birga bo‘lardik.
...biz o‘ylab ko‘rmadik.

***

Hech bo‘lmasa bitta
Kitob chop etsam kerak
Meni sog‘inganingda
Kitobimni quchib
yig‘lashingga.

***

Sen ko‘p o‘ylading
Nega o‘shanda
Uning ko‘zlariga
Ko‘proq
Tikilmaganingga...

***

Sen haqingda esimda qolgani:
Sen
kulgularing
orasida
yig‘lab olarding.

***

Balki
seni sevmasman, deb
yana seni
ko‘rgani bordim.
Bekor boribman...

Ahmad Ali Dilmurod

@salimov_blogi