#maqol
Ayoz, koʻrgan kuning unutma, koʻn chorigʻing quritma

Ayoz ismli oddiy bir choʻpon aqlliligi va hozirjavobligi tufayli xon vaziri darajasiga koʻtariladi. U choʻponlikda kechirgan ogʻir kunlarini unutmaslik uchun chorigʻini hamma vaqt koʻzi tushib turadigan joyga – oʻz xonasining eshigi tepasiga osib qoʻygan ekan. Har gal chorigʻiga koʻzi tushganida oʻziga oʻzi: “Ayoz, koʻrgan kuning unutma, koʻn chorigʻing quritma!”, deb qoʻyarkan. Bu maqolni biror yuqori martabaga mingach (yoxud katta boylikka ega boʻlgach), oʻzining avvalgi holini unutgan, oʻzidan pastroq martabadagilarni (yoxud kambagʻallarni) mensimay qoʻygan kishilarga nisbatan aytadilar.

Maqolda “koʻn chorigʻing quritma” deyilishiga sabab shundaki, oʻtmishda koʻndan (xom teridan) tikilgan choriq qovjirab yorilib ketmasligi uchun vaqti-vaqti bilan moylab turishgan.

Bundan tashqari, atlas kiysang boʻzingni unutma, kimxob kiysang – alagingni varianti ham mavjud.

Kimxob – oʻrishi (uzunasiga toʻqilgan ipi) ipak, arqogʻi (koʻndalang toʻqilgan ipi) zardan toʻqilgan mato.

Alak – paxta ipidan qoʻlda toʻqilgan mato, silliq boʻz.