"ВОР В ЗАКОНЕ" БАХТИ ТАШКЕНТСКИЙ ТИРИК. ҚОРОВУЛБОЗОР ҚАМОҚХОНАСИГА ОЛИБ КЕТИЛДИ

Охирги кунларда ижтимоий тармоқларда Ўзбекистондаги ягона "вор в законе" ҳисобланган "Бахти Ташкентский" лақаби билан танилган Бахтиёр Қудратуллае вафот этгани ҳақидаги хабарлар тарқалди. Бироқ бу маълумот ҳақиқатга тўғри келмайди. Яқинларидан бирининг Элтузга айтишича, Бахти Ташкентскийнинг ўлими ҳақидаги хабар – фейк.

Унинг маълум қилишича, Бахтиёр Қудратуллаев икки ҳафта муқаддам Бухоро вилоятидаги Қоровулбозор қамоқхонасига олиб кетилган. У ердаги карантин муддати тугаган ва 25 феврал куни хотини ҳамда қизи билан учрашиши кутилмоқда.

Қоровулбозор қамоқхонаси ўта махсус режимли муассаса ҳисобланиб, бу ерда жиноятчилик оламидаги нуфузли шахслар ва оғир жиноятчилар сақланади.

2024 йил июлида суд Бахтиёр Қудратуллаев ва унинг яқинларига нисбатан ҳукм чиқарган. У қатор жиноят моддаларида айбланиб, 20 йил озодликдан маҳрум қилинди. Суд қарорига мувофиқ, у жазо муддатининг учдан бирини критий (ёпиқ) режимда, кейинги қисмини эса баракда ўтайди. Жазосининг учдан бир қисмини ўтаганидан сўнг, уни строгий режимга ўтказиш режалаштирилган.

Қоровулбозор қамоқхонасида махсус режимда жазо ўтаётган маҳкумлар учун жуда қатъий қоидалар мавжуд:

🔹 6 ойда бир марта маҳкум яқинлари билан учрашиши мумкин.
🔹 6 ойда бир марта посилка қабул қилишга рухсат берилади.

Ҳозирда 53 ёшда бўлган Бахтиёр Қудратуллаев Ўзбекистонда "вор в законе" мақомига эга ягона шахс ҳисобланади.

Ижтимоий тармоқларда унинг ўлими ҳақида тарқалган миш-мишлар ҳеч қандай расмий манбалар томонидан тасдиқланмаган.

Шунингдек, унинг соғлиги ҳақида ҳам аниқ маълумотлар йўқ. Бироқ ҳозирча маълум бўлгани шуки, у тирик ва махсус режимда жазо ўташни давом эттирмоқда.

💬Telegram |📱Facebook |
🐦Twitter |📱Instagram | ▶️YouTube