“Ўзбекистонлик” форуми муҳокамаси авжига чиққан вақт “Ўзбекистонлик” фильмининг 4-эпизодини кўрган эдим.

Форумга сарфланган пуллар, уларнинг манбалари билан қизиқмай (шунча кетганнинг бирида, биринчи марта форум ўтказмаяпмиз-ку), 4-эпизодни кўришни тавсия қиламан.

Фильмдан ўзим учун, болаларим учун кўп нарса олдим.

* Орзуларига эришиш учун болага озодлик бериш;

* Танлов қилиш ва унинг оқибатини ҳам англаш;

* Масъулиятдан қочмай, қарор қабул қилиш;

*Ота-онанинг эмас, ўз орзуси рўёби учун ишлаш. Умуман, ота-она, таниш-билишларнинг кутилма ва орзулари орасидан одам ўзининг орзусини ажратиб олиши ва унга эришиш учун меҳнат қилиши;

* Натижага эришиш учун иқтисодий қийинчиликлар, носоғлом оилавий муҳит ҳам тўсқинлик қилолмаслиги;

* Илмнинг аҳамияти. Агар бирор танишим “Пашшалар асаб тизимининг эмбрионал ривожланишини ўрганяпман” деса, аниқ кулган бўлардим. Балки Сиз ҳам куларсиз. Фильмни кўргач, бундай қилолмайсиз;

* Қобилиятим йўқ, аниқ биламан - қўлимдан келмайди, деган чегаралар фақат миямизда экани, одамнинг қобилиятларига чегара йўқлиги;

* Менга энг маъқул келган хулоса: чарчаётган бўлсангиз дам олинг, стресс бўлса, ўзингизни бошқа ишга қаратинг. Қаҳрамон бўлиб муаммони ҳал қилиш эмас, муаммонинг олдини олиш керак;

* Сифатли билим олиш, суриш имконияти пайдо бўлса, қўлдан чиқармаслик.

Фильмни кўринг, балки Сиз бундан ҳам яхшироқ хулосалар чиқарарсиз.

“Ўзбекистонлик” деб қидирувга берганингда, мана шундай оғир хабарлар эмас, муваффақиятли ватандошларимиз ҳам чиқиши қандай ёқимли.