БУ ДУНЁ

Ахх, дунёя дунё, бозори чаққон,
Не каслар терилган раста бу дунё.
Тузган савдосида алдов ҳукмрон,
Пуллардан ясалган даста бу дунё.

Гадолар кўрдим мен - тўрваси тешик,
Бинолар кўрдим мен - йўқ унда эшик.
Бир ёғочдан тобут, боз шундан бешик -
Ясаб юрган қадим уста бу дунё.

Барчамиз гуноҳкор, гуноҳимиз йўқ,
Умр - қайтмас дарё, огоҳимиз йўқ.
Меҳр қўйдик хато, паноҳимиз йўқ,
Билмам, не тузалмас хаста бу дунё.

Маъно не ким озроқ, ким топар кўпроқ,
Хазон қайта яшил бўлурми япроқ.
Ортимиз, боримиз, олдимиз - тупроқ,
Бизни суриб борар аста бу дунё.

Ўйнашма, алданма дунёга дерди,
Берилма, таланма дунёга дерди.
Олов у, қаланма дунёга дерди...
Бувим чақиб кетган писта бу дунё.

БОБУР БОБОМУРОД

@bobur_bobomurod