"Ногирон бўлиб қолган гўдак учун жавобгарлик кимнинг зиммасида?"

Мазкур ҳолат юзасидан депутат сўрови юборилди

Олий Мажлис Қонунчилик палатасидаги “Адолат” СДП фракцияси депутати сўнгги кунларда ижтимoий тармоқларда тарқалиб, аҳоли орасида турли муҳокамаларга сабаб бўлаётган ҳолат — Тошкент шаҳрида иситма билан мурожаат қилган чақалоққа нотўғри муолажа қўлланилиши оқибатида қўлида гангрена ривожланиб, кесиб ташланганлиги юзасидан Соғлиқни сақлаш вазирлигига депутатлик сўрови юборилди.

Маълум бўлишича, юқоридаги ҳолат пойтахтда жойлашган 1-сонли шаҳар клиник шифохонасида рўй берган. Боз устига яқинда ижтимоий тармоқларда шунга ўхшаш вазият, яъни Фарғона вилоятида чап оёғи кесилиши керак бўлган беморнинг ўнг оёғи кесиб ташланганлиги юзасидан ҳам хабарлар тарқалган эди.

Агар тиббий хизмат кўрсатиш жараёнида шу каби хатоликлар тез-тез кузатилиб, инсон ҳаёти ва саломатлигига жиддий зарар етказилаётган бўлса, бу тизимдаги назоратнинг заифлиги ва масъул шахсларнинг ўз вазифаларига бефарқлигидан далолат беради. Бундай вазиятларда масъул шахсларни аниқлаш, уларни жавобгарликка тортиш ва келажакда бундай ўта аянчли ҳолатларнинг олдини олиш бўйича қатъий чоралар кўриш зарур.

Шу боис, партиянинг Олий Мажлис Қонунчилик палатасидаги фракцияси аъзоси томонидан Соғлиқни сақлаш вазирига бу каби мудҳиш ҳолатларнинг қайтарилмаслиги юзасидан қандай қўшимча чора-тадбирлар амалга оширилаётгани, умуман, мамлакатимиз ҳудудида аҳолига тиббий хизмат кўрсатиш ҳолати, нотўғри тиббий муолажа натижасида инсон саломатлигига зарар етказилишининг олдини олиш бўйича ҳолатлар устидан қай даражада тегишли назорат ўрнатилганлиги юзасидан ўз нуқтаи назарини баён этиш талаби билан депутатлик сўрови юборилди.

"Адолат" СДП
Матбуот хизмати

🌐 Adolat.uz |🔵 Facebook | 🚀Telegram |📷 Instagram |🐤  Twitter  | 🎬 YouTube