Abdurahmon Meshayan

​​Тун ярмида ижод.
Ижод жой, вақт, танламайди.
Шоирнинг кайфияти бор-йўқлиги, ишлари қандайлиги билан ҳисоблашмайди.
Ижоддамиз, Алҳамдулиллаҳ.

"ЭСКИЛИК САРҚИТИ"

Қалбида қолмади нур бирла иймон,
Кўнглида занг бисёр темир зангича.
"Эскилик сарқити" чарчатиб ёмон,
Яшаб кўрай деди аблаҳ "янгича".

Ўйлади беҳуда юрибман боқиб,
Ахир аллақачон қўйган эсин еб.
Рухий хастахона унинг-чун топиб,
Ташлаб келди охир онам "эски" деб.

Унга қилиб қолгач виждон халақит,
Уни хам буюмдек юракдан отди.
Гарчи тиллоларин деёлмас сарқит,
Охир Ватанни хам "эски" деб сотди.

Ўз-ўзига қилди жирканиб хитоб:
Қачондан бўлмишсан бунчалар сахий?
Нечун сенга керак бу "эски китоб",
Ўн тўрт аср аввал қилинган ваҳий?

Қирқ йил бир ёстиққа бирга бош қўйган,
Хотинга хам деди қолишгач холи.
Уч талоқсан энди мен сендан тўйган,
Эскисан биларку бутун аҳоли...

Хаёлга берилдим тутингиз маъзур,
Аммо "эски" сўзи тинчимни бузар.
Бу "янгипараст"тлар халқим минг узр,
Кўнсанг эски дея масжидинг бузар.

Булар ўйлар билмас халқ кимлигимиз,
Аммо Хақ уларни яхши танийди.
Барҳам топса эди бу жимлигимиз,
Балиқ бўлмоқликдан кечсак қанийди.

Булар разилликлар ўйлаб топганча,
Мўминлар бошига келар етгиси.
Янги янги деру имкон топганча,
Хеч "эски дунё"дан келмас кетгиси...

telegram.me/a_meshayan
22:15-29.04.2019
Абдураҳмон Мешаян

​​ЁНИМНИ ОЛ

Эй қушгинам мендан қўрқма,  кафтимга қўн донимни ол
Етимман деб ўксинмагил тузимни ич,  нонимни ол.

Беморгинам оқиб ётур томирларим дарёсида,
Зарур бўлса соғаймоққа керагича қонимни ол.

Эй ағёрим босиб юрма қадамларинг заминимга,
Ҳоинларча йўл тутмасман демам олтин конимни ол.

Сув ичиб қўймасин риё булоғидан қалб жайрони,
Ўткинчи шон керак бўлса эй дўст келиб шонимни ол.

Паноҳингга зорман ё Раб, Паноҳингсиз хорман ё Раб,
Кўрсин ажам,  туйсин араб, Ҳарамингда жонимни ол.

Ё Раб Сенга келолмас бас. Ёв қўлидан ҳеч не келмас.
Отам эмас онам эмас- Ўзинг маним ёнимни ол.

@A_meshayan
01:17-29.04.2025
Абдураҳмон Мешаян

​​​​ҲАЙИТИНГИЗ БЎЛСИН МУБОРАК!

Парвардигор бирдир деганлар,
Рамазонда нафсин енгганлар,
Фақат халол луқма еганлар,
Ҳайитингиз бўлсин муборак!

Золимларнинг бўшар тўрлари,
Тўрларидан яқин гўрлари.
Пайғамбарнинг меросхўрлари,
Ҳайитингиз бўлсин муборак!

Тақлид қилмас эшакка отлар,
Ахир улар ханграшга ётлар,
"Рождество"ни кутмаган зотлар,
Ҳайитингиз бўлсин муборак!

Бу Рамазон тез тугади деб,
Йиғлаяпман ич-этимни еб,
Иймонига беролганлар зеб,
Ҳайитингиз бўлсин муборак!

Ушбу кунни узоқ кутганлар,
Иғвонида чин унутганлар.
Рамазонда рўза тутганлар,
Ҳайитингиз бўлсин муборак!

Аллоҳ дея дардин енгганлар,
Сажда қилиб бошин эгганлар,
Мусофирлик нонин еганлар,
Ҳайитингиз бўлсин муборак!

Хақ йўлида оққан қонлари,
Хақ йўлида чиққан жонлари.
Бутун дунё мусулмонлари,
Ҳайитингиз бўлсин муборак!

Иншааллоҳ...
Баданимни тарк қилмаса жон,
Томиримда музламаса қон,
Етмиш кун сўнг, шеър битгум Қурбон,
Ҳайит бўлсин дея муборак!

15:02-25.06.2017
Абдураҳмон Мешаян

​​ҲАЙИТДА НИМА БОР МОЗОРДА?

Байрам куни қилганча аза,
Ланг очиб қўйганча дарвоза.
Фақат жоҳил қиладир маза.
Ҳайитда нима бор мозорда?

Дейилмаган ахир Қуръонда:
"Байрамингни кут қабристонда".
Шодланишинг керакли онда,
Ҳайитда нима бор мозорда?

Эй жоҳил айт сен менга шуни,
Саккизинчи март келган куни.
Қилмассанку сен ахир буни,
Ҳайитда нима бор мозорда?

Рождествода насроний одам,
Қабристонга босмайди қадам.
Байрам қилиб яйрайди ҳар дам,
Ҳайитда нима бор мозорда?

Бу ишни қилмаган пайғамбар,
Хатто саҳобалар бехабар.
Бидъатингни бас қил биродар,
Ҳайитда нима бор мозорда?

Еб-ич, яйра, олсангчи роҳат.
Ўзи юрак-бағринг жароҳат.
Масжидларда қил истироҳат,
Ҳайитда нима бор мозорда?

Наҳот шундоқ онги чириксан?
Шундайин ҳам дарди йириксан.
Ўликни қўй, ҳозир тириксан,
Ҳайитда нима бор мозорда?

Тўйинг куни чекканча жабр,
Бормайсанку кўргани қабр.
Байрам куни бу ишинг надир,
Ҳайитда нима бор мозорда?

Байрам куни кулиб, бўлмай шод,
Фақат телба йиғлар солиб дод.
Нуқул қилиб беҳуда фарёд,
Ҳайитда нима бор мозорда?

Аллоҳ берган ноз-неъматга тўй,
Байрам куни қурбонлигинг сўй.
"Патаха"нгни бошқа кунга қўй,
Ҳайитда нима бор мозорда?

@A_meshayan
16:33-08.07.2022
Абдураҳмон Мешаян

​​#ҚУРЪОН_ОЙИДАН_АЙРИЛАЁТИБ

Сен билан илк кўришганда-
Қалб эди муз.
Кўклам тугаб, ёз  оҳирлаб-
Келганди куз.

Кўзлар йиғлаб, юрак эди-
Тамом бўлган.
Ул чоғ эди эндигина-
Отам ўлган.

Билган эдим пучдир ўзга-
Мафкуралар,
Ёдлар эдим, кичик-кичик-
Зам суралар.

Бахтдан тополмасдим ўзни-
Қўярга жой.
Эй мен шаҳодат келтирган-
Муборак ой.

Ўн икки йил бўлди сени-
Билганимга.
Келганингга шукроналар-
Қилганимга.

Кўришармиз ҳар йили биз-
Шундан буён,
Гоҳ йигирма тўққиз, гоҳ-
Ўттиз кун аён.

Ўтди бундай ўттиз кундан-
Неча-неча.
Насиб этди ўн икки бор-
Қадр кеча.

Барокатинг қандоқ қилмай-
Айт эътироф,
Расул янглиғ ўтирмишман-
Кўп эътикоф.

Ўрганмишман ялқовликмас-
Илғорликка.
Кўприк солдим саҳарликдан-
Ифторликка.

Шаъбон ойи тугаганда-
Этиб мамнун,
Шаввол ойи бошланганда қилдинг маҳзун.

Ташрифларинг ой кўришла-
Бошланадир.
Кетарингда ой кўрсам
Кўз ёшланадир.

Дейсан: Мўмин маҳзун бўлма-
Қайтажакман,
Келгуси йил яна салом-
Айтажакман.

Кетмоқдасан эй Аллоҳдан-
Буйруқ олган.
Қайтганингда, бўлмасайдим-
Ухлаб қолган

Оғрир бугун юрагимнинг-
Хамма жойи,
Айт эртадан айрилиқми
Қуръон ойи?

@A_meshayan
24.06.2017
Абдураҳмон Мешаян

​​​​#Саҳобалар #ҳаётидан #шеър

#СУМАЙЯ #РОЗИЯЛЛОҲУ #АНҲО

Кўздан уйқум қочиб қоқ ярим тунда,
Саодат асрига элтади хаёл.
Кўз олдимга келар дафъатан бунда,
Икки туя аро боғланган аёл!

Бир туяга эди шўрлик аёлнинг,
Бир оёғи бирла бир қўли боғлиқ.
Бошқа бир туяга иккинчи қўли-
Оёғи боғлиқдир... оғриқ нечоғлиқ...

Туялар хайдалди бир бирдан узоқ,
Оёқ-қўллар э вох мажбур керилди.
Сўнгра вақтинчалик тўхтади қийноқ,
Аёлга шу қадар азоб берилди.

Абу Жаҳл топиб бу ҳолдан хузур,
Аёлнинг қошида жилмаярди шод.
Оғриқлар дастидан бўлсада мағрур,
Сумайя чидолмай кўтарди фарёд.

Туялар жойига қайтарилдилар,
Аёлнинг бўшашди оёғи, қўли.
Сўзлашга киришди Абу Жаҳлнинг,
Ўзиданда жирканч кирланган тили:

Афсус у забондан сочилмади бол:
-Хўш қалай Сумайя қилдингми мазза?
Азоб уқубатинг тугайди дарҳол,
Муҳаммадни инкор қилганинг лаҳза!

-Ўлсам хам мен уни қилмайман инкор!
Шу бўлди Сумайя айлаган жавоб.
Абу Жаҳл қилгач ишора бир бор,
Туякашлар яна бердилар азоб...

Ёрдам беролмади на эри Ёсир,
Ёвдан қутқармади на ўғли Аммор.
Бу вақтда улар хам ғам чекиб ахир,
Сумайя ёнида чекарди озор.

Азоб чекар эди бутун оила,
Дашт ичра, дашт номи аталар Рамда.
Бир кун қалбларида чексиз дард ила,
Ёнларидан ўтди Расулим ғамда.

-Сабр қилинглар, эй Ёсир оиласи!
-Сабр қилинглар, эй Ёсир оиласи!
Дедилар: Сизларга мукофот жаннат,
-Сабр қилинглар, эй Ёсир оиласи!

Шу он қум устида судралаётган,
Сумайянинг ёри Ёсир чекиб ох-
Деди: Замон доим зўравонники-
Бўлаверадими ё Расулуллоҳ?

Бу савол жавобсиз қолдирилди лек,
Аллоҳга ёлбориб аста ушбу дам.
-Ёсир оиласидан раҳматинг дариғ-
Тутма Аллоҳ, деди Расули Акрам.

Ёсир оиласининг энг сўнгги куни...
Тўрт жон қийналарди жуда хам ёмон.
Оғир хатто қилмоқ тасаввур буни,
Кетарди дод фарёд саси хар томон.

Ўғиллар Аммор ва Абдуллоҳ, хамда-
Эри Ёсир шерик дард борасида.
Боғланиб Сумайя қолганди ғамда,
Иккита туянинг нақд орасида.

Шароб тўла коса бўшатгач Амр,
Деди: сен бу динга қўйдинг муҳаббат.
Чунки ошиқ қилган Сумайя ахир,
Сени дин келтирган ўшал Муҳаммад!

Сумайя нетарди ожиза эди,
Қони аввалгидек гупуролмасди.
Фақатгина: Олчоқ, уятсиз! деди,
Унинг юзларига тупуролмасди!

Абу Жаҳл бирдан бўлиб дарғазаб,
Қўлдаги косасин отганча ерга.
Хизматкорларига айтди атайлаб:
Туяларни саванг ботганча терга!

Туялар шундайин саваландики,
Улар жонхолатда югурган маҳал.
Сумайянинг тани бўлинди икки,
Унга жаннат эди жуда хам маҳтал...

Шунда хам тинчимай ит Абу Жаҳл,
Энг маҳрам жойига санчиди найза.
Жон берди лек бўлди жаннатга доҳил,
Гўё еру осмон тутдилар аза.

Сумайядан кейин маҳрами Ёсир,
Хақнинг рахматига аста қовушди.
Шаҳидлик шаробин ичганча охир,
Иссиқ қони оқиб охир совушди.

Бизчи нима қилдик динимиз учун,
Гарчи ҳеч ким йўқдир савалагани.
Қўрқиб зиндон ёки сургундан нечун,
Умр тикдик жонни авайлагани?

Ожиз уммат бўлиб қолганимиздан,
Кофирга мўминнинг қони халолдир.
Илм олмоқликдан толганмиздан,
Нусратга эришмоқ амримаҳолдир.

Эркакларда йўқдир номус, хамият,
Оқсоч бўл деб қилар аёлни даъват.
Бўлдик тарозуси бузуқ жамият,
Биз хотин зотини хўрладик фақат.

Биз хотин зотига қўшиқ дедирдик,
Уялмай хорижга юбордик сўнгра.
Аёлга хаттоки нажас едирдик,
Сўнг дедик: Иста ўл, хохласанг хўнгра.

Биз Ёсир бўлолсак хотинлар албат,
Сумайя бўлишга шайланажакдир.
Абу Лаҳаб бўлсак улар хам фақат,
Умму Жамилларга айланажакдир.

Келинг, айламайлик аёлни тахқир,
Айтиб ғарбликларнинг фахш латифасин.
Эркак эмас аёл безаган ахир,
Шаҳидлик дафтарин илк саҳифасин!

@A_meshayan
02:54-13.10.2020
Абдураҳмон Мешаян

​​#УСМОН_РОЗИЯЛЛОҲУ_АНҲУ_ВА_ЗАВЖАЛАРИ

Қалбида тошганда илҳом булоғи,
Шоир хақиқатни оққа кўчирди.
Сиз билан сиз бўлгач суянган тоғи,
Руқайя бахтиёр ҳаёт кечирди.

Пайғамбарнинг қизи топгунча вафот,
Унга юзландингиз муҳаббат билан.
Сўнг никоҳ риштасин боғладингиз шод,
Умму Кулсум бинти Муҳаммад билан.

Бошқа ёрингиз ҳам сизни улардан,
Оз севмади тарих гувоҳдир албат.
Безиб Муовия совчиларидан,
Отика подшоҳнинг ишқин қилди рад.

Ғофиқий ибн Ҳарб ҳамла қилган дам,
Темир қилич ила сизни урди воҳ.
Сўнгра ўқиётган мусҳафингизни,
Тепиб юборди у муттаҳам гумроҳ.

Мусҳафга тўкилди шунда қонингиз,
Тарихчилар буни битди қалам-ла.
Энди олмоқ учун сизнинг жонингиз,
Савдон ибн Ҳумрон қилганда ҳамла-

Қизингиз йўлини тўсди у итнинг,
Ва хотинингиз ҳам жон жаҳди ила.
Шунда унинг қўли кесилиб кетди,
Панжасидан жудо бўлди Ноила.

Душманлар қутириб сиз ўлгач энди,
Ғазабга чунонам тўлганларида.
Яна йўлларини ёрингиз тўсди,
Бошингиз кесмоқчи бўлганларида.

Ҳайратда қоляпман Руқайя асли,
Сизнинг қадрингизни албатта сезган.
Пок Умму Кулсум ҳам пайғамбар насли,
Сизни жонидан ҳам ортиқроқ севган.

Отика сиз ўткач қурмади турмуш,
Совчи қўйганда ҳам улуғ ҳалифа.
Ноила тик боқди душманингизга,
Қизларимиз бўлсин шундай афифа.

Ҳаётингиз ўқиб шунди уқдим мен,
Оғир мусибатмас кундошлик демак.
Агар аёлларинг севдиролсанг сен,
Ҳам яна бўлолсанг хақиқий эркак.

@A_meshayan
17:27-09.08.2023
Абдураҳмон Мешаян

​​ЛАЙЛАТ-УЛ ҚАДР

Қувончдан кўзимдан ёғмоқдадир сел,
Сени узоқ кутди энг бағрикенг эл.
Эй маним минг ойдан яхшироғим кел,
Хис қилай бахт надир, сакийнат надир?
Ташрифинг муборак Лайлат-ул қадр!

Севмади пок қалбим черков бонгини,
Масжид банд қилган-чун мўмин онгини,
Рамазон тўккандек қалбим зангини,
Сени интиқ кутдим, либосим сабр,
Ташрифинг муборак Лайлат-ул қадр!

"Рождество"ни  дея дард ютганим йўқ,
Ёҳуд "Хеллуин"ни зор кутганим йўқ.
Менга санчилгунча ажал деган ўқ,
Қалбимни хушнуд қил ютгунча қабр,
Ташрифинг муборак Лайлат-ул қадр!

Хақнинг мархамати бунчалар хам кенг,
Барокатли оқшом қилмиш  сени энг.
Саксон уч йил бирла бўлибдирсан тенг,
Бахтлиман, билдимку Хақ ишқи надир,
Ташрифинг муборак Лайлат-ул қадр!

@A_meshayan
2017-йил
Абдураҳмон Мешаян