O‘zbekiston texnik jihatdan tartibga solish agentligi direktori Akmal Jumanazarov xalqaro ekspert Gevorg NAZARYAN bilan uchrashuv o‘tkazdi.

Yevropa Ittifoqi (YEI) moliyalashtiradigan va Xalqaro savdo markazi (ITC) tomonidan amalga oshiriladigan "O‘zbekistonning JSTga a’zo bo‘lishiga ko‘maklashish" loyihasi doirasida o‘tkazilgan uchrashuvda standartlashtirish to‘g‘risidagi qonunchilik, standartlashtirish sohasidagi munosabatlarni tartibga solish, texnik qo‘mita va quyi texnik qo‘mitalar faoliyati, kadrlarni tayyorlash, qayta tayyorlash va ularning malakasini oshirish, xalqaro standartlashtirish tashkilotlari bilan hamkorlikni rivojlantirish va milliy standartlashtirish tizimini xalqaro tizim bilan uyg‘unlashtirish kabi dolzarb masalalar muhokama qilindi.

Milliy iqtisodiyotni rivojlantirishda standartlarning o‘rni, texnik tartibga solishga oid milliy qonunchilikni JST bitim, qoida va me’yorlariga muvofiqlashtirish, JST normalarini milliy qonunchilikga implementatsiya qilish, standartlashtirish tizimiga raqamlashtirishni zamonaviy axborot-kommunikatsiya va innovatsion texnologiyalarni joriy etish masalalariga e’tibor qaratildi.

Standartlashtirish tizimi infratuzilmasini takomillashtirish va 2030-yilgacha mo‘ljallangan Strategiya ishlab chiqish ustuvor yo‘nalish sifatida qayd etildi.

Muloqot yakunida muhokama qilingan mavzular yuzasidan mutaxassislar uchun seminar-treninglar tashkil etishga kelishib olindi.