Амир Темур ўз одатига кўра дастлаб Миср султонига яна бир бор элчи билан ўз мактубини юборди. Ушбу хатда 1393 йили жўнатилган амир Темур элчиларини қатл қилинганлиги, Авник қалъасининг ҳокими бўлган Аталмиш Қавчиннинг ҳали ҳам Мисрда асирликда сақланаётганлигига эътироз билдирилган. Шунингдек, Аталмиш Қавчинни асирликдан озод қилинса Мисрнинг Шом устидан ҳукм юритишига Амир Темурнинг эътирози бўлмаслиги, акс ҳолда уруш муқаррарлиги ҳам таъкидланган.