ҚИШНИНГ СЎНГИ КУНЛАРИ...

Кўкдан меҳр ёғмоқда,
Борлиқ дилгир, беғубор.
Кимдир эшик қоқмоқда,
Келяптимикан баҳор?!..

Мўралайди бойчечак,
Ялпизлар атак-чечак.
Қиз бошида толбаргак,
Келяптимикан баҳор?!..

Кекса тоғ қилар нола -
Чопқиллайди шалола.
Юракми, ё бу лола,
Келяптимикан баҳор?!..

Қирнинг бағри яшил соч,
Ҳур қушлар ёзар қулоч.
Вижир-вижир қалдирғоч,
Келяптимикан баҳор?!..

Ўзгаради қадамлар,
Хушкайфият одамлар.
Хандон отар бодомлар,
Келяптимикан баҳор?!..

Кетар ғам, арийди дард,
Қуйилар оби-раҳмат.
Юртимга бўйлар жаннат,
Келяптимикан баҳор?!..

Акрамжон АЗИЗОВ

Админларга мурожаат
👇👇👇👇👇👇👇
@Begjanov_Javoxir
@Abdullajonov_Jasurbek

Телеграм 😎: @Kugayliklar_uz