Baxriddinoff | Blog

Kuchli tomoningni top!

Yaqinda do’stlarim bilan suhbatlashdik. Suhbat davomida gap borib-borib insonning kuchli tomoniga keldi.

Bu haqida oldinam o’ylagandim. Shu sababli, ularga o’zimni misolimda qisqacha tushuntirish berib o’tdim.

Masalan, men o’zimda yozishni kuchli tomonim, deb bilaman. Bu boshqalardan emas, o’zimdagi kuchli tomon.

O’ziga juda katta baho berib yuboribdi, deb yurmagin tag’in. Shunchaki qobiliyatlarim orasida yaxshirog’i shu )

Buni o’zimning 2 ta hayotiy misolim yordamida tushuntiraman:

1. Universitet sessiyasi — 2-kursning 2-semestridan boshlab, umuman oraliq va yakuniylarga tayyorlanmaganman.

Faqatgina yoza olishim, shaxsiy fikrimni mendan so’ralgan mavzuga bog’lay olishim orqali o’tganman imtihonlardan.

Yana past ball bilan emas, juda ko’p holatda 71% dan yuqori ball to’plaganman. Kursdoshlarim doim hayron qolgan.

2. Marketing sferasi — bu sohaga endi kirgan vaqtlarimdan toki hozirgacha yozish qobiliyatim orqali pul topganman.

Kontent maqola, kontent ssenariy, PR maqola, progrev ssenariy va blog postlar yoza olishim ishimni osonlashtirgan.

Yuqoridagi ishlarni qila olishim natijasida menga qo’shimcha vakansiya va loyihalardan taklif kelib tushavergan.

Xo’p, yaxshi, nima demoqchisan endi? Maqsadga o’t! deyishingdan oldin o’zim nima demoqchiligimni yoza qolay.

O’zingni kuchli tomoningni top. Har bir inson boshqalarga qaraganda yaxshiroq qila oladigan bir qobiliyat bo’ladi.

Aynan o’sha qobiliyatingni top. Uni rivojlantirish ustida ishla. Qobiliyatingni monetizatsiya qilish yo’llarini o’rgan.

Ishonaver, hayoting oldingiga qaraganda boshqacha bo’ladi. Oldin o’ylab ko’rmagan ishlaringni qilishni boshlaysan.

O’zimdagi yaxshi qobiliyatni qanday qilib topaman, deysanmi? Quyida senga qisqacha tavsiyalar beraman:

— Hayotingni qaysi yo’nalishida boshqalariga qaraganda yaxshiroq natijaga erishganingni aniqla.
— O’zingni ich-ichingdan his qilib ko’r. O’zingni yaxshiroq tanib olish uchun o’zing bilan suhbatlash.
— Seni eng yaxshi taniydigan, birga ko’p vaqt o’tkazadigan insonlardan sendagi qobiliyatlarni so’ra.

Buni keyinga surish kerak emas. Qancha oldin boshlansa, shuncha yaxshi bo’ladi. Bu samimiy tavsiyam, xolos ))

@Baxriddinoff_Blog

2/2025 ✔️

«Jinoyat va jazo» — Fyodov Dostoyevskiy

Bu kitobni o’qish mendan 40 kun vaqt talab qildi. Bunga kitobni o’zi sababchi emas, ishim ko’pligi vaqtni uzaytirdi.

Kitobning boshidanoq uning keyingi syujetiga qiziqib, o’qiyverish hech gap emas. Menda shunday ham bo’ldi.

«Jinoyat va jazo» insonning ruhiyatida kechishi mumkin bo’lgan eng og’ir holat: o’zi bilan kurash haqidagi kitob.

Romanning asosiy qahramoni Raskolnikovning fikriga ko’ra: insonlar 2 turga bo’linadi. Oddiy va g’ayrioddiy.

G’ayrioddiy odamlar ayrim qonunlarni chetlab o’tishi mumkin, qachonki ularning g’oyalari ezgulikka xizmat qilsa.

O’zini shunday insonlardan biri deb hisoblagan roman qahramoni o’z ruhiyati bilan ayovsiz olishuvga qo’l uradi.

Raskolnikov sodir etgan jinoyatining oqibatida o’zi bilan o’zi uzoq kurash olib boradi, o’zini butkul «yeb bitiradi».

U o’zidagi bu ruhiy holatni: «Men kampirni o’ldirmadim, men o’zimni o’ldirdim!» jumlasi bilan aks ettirib bergan.

Kitobda insonlar orasidagi mehr-muhabbat, ishonch va qo’llab-quvvatlov juda samimiy tarzda yoritib berilgan.

Disclaimer qilaman. Kitob oxirida Raskolnikov aynan shunday muhabbat, qo’llab-quvvatlov natijasida omon qoladi.

Bu kitob haqida uzoq yozish mumkin. Shusiz ham oxirgi vaqtlarda F. Dostoyevskiy ancha trendga chiqib ulgurdi.

Agar haqiqiy adabiyot va romanning ta’mini sezishni istasangiz, bu kitobni, albatta, o’qishingiz kerak bo’ladi.

Muallifning boshqa asarlarini ketma-ketlikda o’qish niyatim bor. Lekin orada biroz pauza olib, hazm qilib olaman.

P. S. Kitob nisbatan katta, mening qisqagina yozgan sharhim orqali uni tushunish mushkul. Yaxshisi o’qib chiqing )

Kitob o’qilish muddati:
09.01.2025—17.02.2025

@Baxriddinoff_Blog

Loyiq bo’lsangiz, bo’ldi…

2024-yilning oxirgi kunlarida o’zim uchun rasmiy dam olish e’lon qilgandim. 2 haftadan oshiq dam oldim.

Orada zerikib ketdim va proyektlarda ishlashni xohlab qoldim. Lekin aksiga olib shu vaqtda proyekt yo’q edi.

O’zi yanvar oyining dastlabki 15-20 kunida deyarli ishim bo’lmasligini oldindan bilardim, kutilgan edi bu.

Oldindan bilsam-da qandaydir tayyorgarlik ko’rib qo’ymagandim. Faqatgina taxminga asoslangan proyektlar.

2025-yilning dastlabki 2 haftasida ko’p vaqtim bekorchilikda o’tdi, dam olish juda avj pallasiga chiqib ketdi.

Mana hozir yana proyektlarni boshlab oldim. Deyarli 7-10 kun oldin bekorchi bo’lsam, hozir juda bandman.

Bitta proyektdan keyin juda qisqa muddatda boshqa proyektlar o’zi meni topib keldi. Bu davom etyapti hali.

Buni o’zimni kamsitish yoki maqtash uchun aytmayapman. Aksincha, bir xulosa sifatida bo’lishmoqchiman.

Proyektlarim to’xtab qolganida ham xotirjam edim, hozir proyektlarim yetarlicha bo’lganida ham xotirjamman.

Xulosa: siz o’zingiz istagan/kutgan narsaga loyiq bo’lsangiz, qancha vaqt bo’lmasin u o’zi sizni topib keladi.

Buni nafaqat ish/proyekt uchun, balki istalgan sohaga qo’llash mumkin. Faqat oldin bunga loyiq bo’lish lozim.

@Baxriddinoff_Blog

Uzoq kutilgan yangilik!

Angliya Premier ligasida ilk o’zbek futbolchisi! 😎

@Baxriddinoff_Blog

1/2025 ✔️

«Atom odatlar» — Jeyms Klir

Adashmasam, bu kitobni 4-urinishda oxirigacha o’qib tugatishga erishdim. Bundan oldin 3 marta harakat qilganman.

Kitob zerikarli bo’lgani uchun emas, meni o’sha vaqtdagi holatimga mos tushmay qolgani uchun o’qimaganman.

«Atom odatlar» har kuni 1% dan yaxshilanib borish, kichik odatlarni davomli bajarishning natijasi haqidagi kitob.

Kitobda odatlarning hayotga ta’siri, qanday o’zgarish, qulaylik va imkoniyatlar olib kelishi haqida fikrlar yozilgan.

Odat — avtomatik darajagacha yetguncha takrorlanadigan xatti-harakat hisoblanadi.

Sizga bu kitob shunisi bilan yoqadiki, yaxshi odatlarni shakllantirish, yomonlaridan qutulish faktlar bilan keltirilgan.

Yaxshi odatni bajarish uchun ko’proq imkoniyatlar, yomon odatni bajarish uchun ko’proq to’siqlar bo’lishi kerak.

Yaxshi odatlarni davomli bajarish uchun mukofot, yomon odatlarni qayta boshlamaslik uchun jazo qo’llash lozim.

Aytaylik, 1 soat kitob o’qiganingiz uchun 20 daqiqa Reels ko’rish, 1 dona sigaret chekkaningiz uchun 50.000 jarima.

Ma’lum bir odatni shakllantirishda unga qancha vaqt sarflanganidan ko’ra, uning necha marta takrorlangani muhim.

Bu kitobda insonlar yangi odatlarni boshlashi, lekin tezda tashlab qo’yishining sabablari misollar bilan keltirilgan.

Oldingizga katta maqsadlar qo’yib harakat qilmaslikdan har kunlik aniq rejani bajarish afzalligini ko’rsatib beradi.

To’g’ri, kitobning ba’zi qismlari, ayniqsa, oxirlari nazariya va psixologiyaga asoslangan, lekin zeriktirib qo’ymaydi.

P. S. Qisqa bo’lsa-da kitob haqida sharh yozishga harakat qildim. Umid qilamanki, sizga manfaatli bo’ladi.

Kitob o’qilish muddati:
01.01.2025—08.01.2025

@Baxriddinoff_Blog

Boshlanishi yomon emas

2025-yilda shaxsiy brendimni rivojlantirish, o’sish va katta maqsadlarni bajarishni reja qildim.

Yilning ilk kunlaridanoq maqsad sari sekin-asta harakatni boshladim. Endi bu kanalda ko’proq aktiv bo’laman.

Butun yilni aynan mana shu kanal va Instagram blogimda yoritib borishga harakat qilaman, kuzatib boring )

@Baxriddinoff_Blog

2024-yil — men uchun

2024-yil — Oldingilaridan butkul farqli ravishda haqiqiy xulosalar, ularning tasdig’i yili bo’ldi men uchun.

2024-yil — Hech kimga bog’lanib qolmaslik, u inson ketishi mumkinligini anglash yili bo’ldi men uchun.

2024-yil — Yilning katta qismini stressda o’tkazib, yaxshi bo’lishiga umid qilish yili bo’ldi men uchun.

2024-yil — Shtatdagi ishdan chiqish fikridan qayta shtatga kirish fikrida tugash yili bo’ldi men uchun.

2024-yil — Nima bo’lishidan qat’i nazar, oila eng birinchi o’rinda ekanini anglash yili bo’ldi men uchun.

2024-yil — Insof/vijdoni uyg’oq insonga bu hayotda yashash qiyin ekanini tushunish yili bo’ldi men uchun.

2024-yil — Qadrini bilmaslik o’zini arzon-garov insonga chiqarib qo’yishini o’rganish yili bo’ldi men uchun.

2024-yil — Hammasi yaxshi yoki yaxshilikka bo’lishini nisbatan yaxshiroq anglash yili bo’ldi men uchun.

2024-yil — Kim nima desa desin, pul ko’p narsani hal qilishini ko’zim bilan ko’rish yili bo’ldi men uchun.

2024-yil — Eski qadrdon do’stlar vaqtlar o’tib begonalashib borishiga guvoh bo’lish yili bo’ldi men uchun.

2024-yil — Freelancer bo’lishning bizga aytilmagan qonun-qoidalari borligini bilish yili bo’ldi men uchun.

2024-yil — Odatlar bizni boshqarishi, holatimiz odatlar zanjiri ekanini tushunish yili bo’ldi men uchun.

2024-yil — Shaxsiy brendimni rivojlantirishga e’tibor bermaganimdan afsuslanish yili bo’ldi men uchun.

2024-yil — Qadar haqidagi tushunchalarim haqiqatda isbot topish yili bo’ldi men uchun.

2024-yil — 2025-yilda xatolarga yo’l qo’ymaslik uchun kerakli xulosalar chiqarish yili bo’ldi men uchun.

2024-yil — siz uchun? 👇

@Baxriddinoff_Blog

1 oylik pauza

Na Telegram, na Instagram bu o’tgan 1 oydan ortiqroq vaqtda meni aktiv bo’lishga unday olmadi.

Shaxsiy va proyektdagi ishlar bilan band bo’ldim. Juda unaqa aytarli ishlar qilib tashlamadim.

Deyarli 20 kun bir varoq bo’lsa-da kitob o’qimadim. Aniq sabab ko’rsatolmayman bunga.

Lekin yaqindan kitob o’qishga qaytdim. Yil oxirigacha o’qishni maqsad qilgan kitoblarim bor.

1 oylik pauzadan keyin o’zimga aytadiganlarim:

• Seni har qanday vaziyatda faqat oilang qabul qiladi
• Sen o’z harakatlaringga mas’ulsan, natijaga emas
• Iloji boricha yaqin tanishlaring bilan hamkorlikda ishlama
• Ish boshlashdan oldin vazifa va to’lovni aniq kelishib ol
• Senda o’xshamayapti degani umuman o’xshamaydi degani emas
• Faqatgina qo’lingdan keladigan ish bilan shug’ullan
• Qayerga qarab ketayotganingni o’zingga eslatib tur
• Har kuni 1 varoq bo’lsa-da kitob o’qi
• Hamma narsada o’zingni ayblashni bas qil
• Bu hayot o’tkinchi ekanligini unutib qo’yma

1 oyga juda ko’pdek, to’g’rimi? Aslida bu xulosalarni oldinroq olib bo’lganman, bu esa eslatma.

Yil oxiriga 2 haftadan ko’proq vaqt qoldi. 2024-yildagi maqsadlarni bajarishda davom etamiz.

@Baxriddinoff_Blog

Hech kimdan hech narsa kutma!

Uzoq yo’l. Uni yo’lga chiqishingdan boshlab, to manzilga yetguningga qadar yolg’iz o’zing bosib o’tasan.

Yo’lingda yangi sheriklar uchraydi, ular bilan yaqinlashasan. Ba’zida ulardan nimadir kutishni boshlaysan.

Ammo sening va ularning manzili boshqa tomonda bo’lishi mumkin. Vaqti kelganida yana yolg’iz qolasan.

Ulardan kutgan ishlaringni o’zing qilishga majbur bo’lasan. Bu holat to manzilga yetguncha bo’lishi mumkin.

Kimdir keladi, sen undan nimadir kutasan. Kimdir ketadi, undan kutganlaringni sen o’zing qilishni boshlaysan.

Birgina to’g’ri qaror: hech kimdan hech narsa kutmaslik. Shunda kim kelishi yoki ketishi qiziq bo’lmaydi senga.

Yo’lni yolg’iz o’zing bosib o’tishing kerakligini qancha oldin anglasang, hayoting shuncha osonlashib ketadi.

@Baxriddinoff_Blog

Oktyabr oyidagi o’qilgan kitoblar )

Davomiylik muhim. Istalgan ishni davomli qilish uni osonroq va tezroq qilishga olib keladi. Kitob o’qish ham shunday.

Bu yerdagi 2 ta kitobni o’qishni sentyabr oyining bir kunida boshlagandim, lekin tugatish oktyabr oyiga qolgandi.

Kitob o’qish odatini davom ettirish bo’yicha challenge e’lon qilganimdan beri natija yomon emas, kutilganidek bo’ldi.

To’g’ri, orada umuman o’qilmagan kunlar ham bo’ladi-yu, lekin bunaqa kunlar ko’paymasligi uchun harakat qilaman.

Nega ko’proq o’qishga harakat qilaman? Mana nima uchun:

1. Dunyoqarashim va fikrlash doiramni kengaytirish.

2. Yangi bilimlar olish, tegishli xulosalarni hayotda qo’llash.

3. Ba’zi bir hayot sinovlaridan o’zimni chalg’itish.

4. Vaqtimni behuda yumushlarga kamroq sarflash.

5. Nimanidir izohlash uchun argument bera olish.

Bilmadim, balki yuqorida yozgan sabablarim kim uchundir mos kelmas. Aslida mos kelishi ham shart emas.

Hamma nimani nima uchun qilayotganini o’zi yaxshiroq biladi. Shuningdek, menda ham shunaqa holat.

Aytgancha, kitoblar bo’yicha tavsiyalarni izohga yozib qoldirishingiz qadrlayman )

@Baxriddinoff_Blog