ЭСЛАБ-ЭСЛАБ!

БАЙТУЛЛОҲДА
Мирзо КАРИМ

Гиёҳга сўрадим, чўпга сўрадим,
Ўпкаси йўқларга, ўпка сўрадим.
Лаббайкани айтиб, боргач Байтига,
Кўп сўраганим йўқ, кўпга сўрадим!

Мен зўру ҳамсоям зор бўлиб турса,
Дўстда йўқ, бир менда бор бўлиб турса,
Ўзим бой, юрагим тор бўлиб турса,
Кўп сўраганим йўқ, кўпга сўрадим!

Ҳар кимса берилган ризқини терсин,
Инсоф шамширини нафсига серсин,
Берса дейман, Аллоҳ барчага берсин,
Кўп сўраганим йўқ, кўпга сўрадим!

Саждада оқмишдир ёшим шалдираб,
Онасиз қўзидек, гирён, палдираб,
Худонинг уйида, қўрқиб, қалтираб,
Кўп сўраганим йўқ, кўпга сўрадим!

Битганим бўлса ҳам минг битта китоб,
Маҳшарда жонимга берармикан тоб,
Мирзода ҳар не бор, берсанг, бер, инсоф,
Кўп сўраганим йўқ, кўпга сўрадим!

http://T.me/mirzolarningmirzosi.

https://www.YouTube.com/channel/UCoRsvGN9EjQ5VZBL0iYEHQg.