Another area | Oʻzga hudud

Mahsharda oddiy odamni payg’ambarlar qatoriga qo’yib qo’ymaydi-ku…

BIR UMRLIK NASIHAT

Ota-onamiz bizga, ayniqsa, kamina faqirga so’zda kamdan-kam nasihat qilganlar, qiladilar. Chunki ularning amallari eng katta va jonli nasihat bo’lgan va haligacha shunday.

Quyida padarimning umrga tatigulik nodir nasihatlaridan birini keltiraman. Ora-orada oʻqib turaman va har oʻqiganimda boshqacha ta’sirlanaman:

“Qizim, qarang, manavi oppoq, ko’ryapsizmi? Undagi kichik kir va dog’lar shundoq ko’rinib turibdi. Manavi esa qop-qora, unda dog’lar ko’rinayotgani yo’q, ko’rinsa ham oqdagichalik emas.

Masalan, ilm o’qimagan yoki o’ziga yarasha ozroq ilm o’qib, qori bo’lgan odamlarda ham ayblar unchalik ko’rinmaydi. Lekin olimda, shu yo’lni tanlagan, shu yo’lda ketayotgan odamda o’sha ayblar yaqqol ko’rinib, bilinib turadi, xuddi oppoq matodagi kabi. Buni omma, ko’p odamlar sezmasligi ham mumkin, biroq Alloh biladi, Alloh ko’radi.

Dugonalaringiz yoki boshqa odamlardagi kichik xato va gunohlar sizda bo’lsa, katta hisoblanadi, katta ko’rinadi. Masalan, falonchi dugonangiz Qur’on yodladi, o’ziga yarasha ilm oldi va oila qildi. Endi shu bola-chaqasi, o’zi bilan o’zi, hayotida yashayveradi. Undagi ayni ayb bilan sizdagi ayni ayb bir xil hisblanmaydi, sizda katta ko’rinadi.

Chunki siz ilm-fan yo’lidagi, ilm talab qilayotgan odamsiz, olimlikni tanlagansiz. Faqat turkiy millatlar olimi emas, (o’zi ular ham juda kam), xalqaro miqyosdagi olimlikka harakat qilyapsiz, dunyo bo’ylab amri ma’ruf, nahyi munkar qilishni, ilmingizni ulashishni qasd qilgansiz. Men koʻrib, bilib turibman-ku nimaga intilayotganingizni.

Sizning tanlagan yo’lingiz juda qiyin, oson emas. Axir Alloh taolo mahsharda oddiy odamni payg’ambarlar qatoriga qo’yib qo’ymaydi-ku. Shunga munosib bo’lganlarni, munosib amal qilganlarni qo’yadi. Bu esa qattiq mashaqqat, unday amal qilish, yashash oson bo’lmaydi. Payg’ambarlar yo’li, hayotlariga qarang.

Katta olimlarning, qadimgi kibor olimlarning kitoblarini o’qisangiz, kichik amallarga ham qattiq e’tibor qilishgan, to’g’rimi? Sunnatga so’zsiz ergashishgan, shundaymi? O’shalarning yo’lidan ketayotgan ekansiz, ular kabi qattiq, mahkam turishingiz kerak. Hammasi har tuni tahajjud o’qishgan, fajrdan keyin uxlashmagan, zikr qilishgan, Qur’on o’qishgan, namoz o’qishgan. Namoz masalasida juda qattiq turishgan.

Bularni sizga aytyapman, o’zim ham bunchalik taqvodor, mahkam emasman, biroq siz boshqasiz”.

15.05.22

#babakız